राजविराज — सप्तरीमा शनिबार दिउँसो गहुँको भुस जलाउने क्रममा शरीरमा आगो लाग्दा एक महिला गम्भीर घाइते भएकी छिन्।

रूपनी गाउँपालिका–६ का सत्यनारायण साहकी श्रीमती ५० वर्षीया अमलादेवीको शरीरमा आगो लागेको हो।

आफ्नै खेतमा भुस जलाउने क्रममा साडीबाट आगो सल्किएर शरीर जलेको प्रहरीले जनाएको छ। उनको शरीरको ४५ प्रतिशत भाग आगोले जलेको जिल्ला प्रहरी कार्यालय सप्तरीका डीएसपी जितेन्द्र बस्नेतले जानकारी दिए।

घाइतेको राजविराज स्थित गजेन्द्रनारायण सिंह अस्पतालमा उपचार भइरहेको छ।

यसैगरी, शनिबार नै खडक नगरपालिका–८ का नागेन्द्र चौधरीको फर्निचर पसलमा पनि आगलागी भएको छ। आगलागीबाट उनको फर्निचर पसल जलेर नष्ट भएको छ। शम्भुनाथ नगरपालिकाको वारुणयन्त्र, स्थानीय र सुरक्षाकर्मीको संयुक्त प्रयासबाट आगो नियन्त्रणमा लिइएको थियो।