शिक्षाबाट वञ्चित बालबालिकाको सहयोगका लागि आयोजित च्यारिटीमा भाग लिन नोरा फतेही नेपाल आउँदै
शीर्ष खबर 
काठमाडौँ– भारतीय अभिनेत्री नोरा फतेही ३ जेठमा काठमाडौँमा आयोजना हुने च्यारिटी कार्यक्रमका लागि नेपाल आउने भएकी छिन्। आफनो अदभुत नृत्यका र सुन्दरताका कारण दर्शकलाई मोहित वनाएकी नोरा फतेहीलाई वल्र्डवाइड फिल्मस् नेटवर्क प्रालिले नेपाल ल्याउन लागेको हो।
प्रालिका अध्यक्ष देव मगरका अनुसार शिक्षाबाट वञ्चित बालबालिकाको क्षेत्रमा काम गर्दै आएको सामाजिक संस्था ‘ह्युुमन रेस्पेक्ट नेपाल’को सहयोगार्थ आयोजना हुने कार्यक्रमका लागि नोरा नेपाल आउन लागेकी हुन।
‘मनोरञ्जनमार्फत सामाजिक कार्यलाई सहयोग गर्ने उद्देश्यले हामीले यो कार्यक्रम गर्न लागेका हौँ, नेपालमा अभिनेत्री फतेहीको माग देखेर हामीले कार्यक्रमका लागि गरेको अनुरोधमा उहाँ सहमत हुनुभएको छ’–उनले भने।
३ जेठमा बौद्धस्थित हायातको चौरमा ‘नोरा फतेही लाइभ इन नेपाल’ शीर्षकमा कार्यक्रम आयोजना हुने उनले बताए। नेपाल आउन र नेपालीलाई भेट्न आफू उत्साहित रहेको अभिनेत्री फतेहीले बताएकी छन्। उनले एक श्रव्यदृश्य सन्देशमार्फत आफू पहिलो पटक नेपाल आउने र यहाँबाट अहिलेसम्म प्राप्त गरिरहेको मायाका लागि धन्यवाद व्यक्त गर्दै आफ्नो प्रस्तुति दिने जानकारी दिइन्।
कार्यक्रमका लागि भारतको मुम्बईबाट अभिनेत्री फतेहीसहित २० बढी नृत्याङ्गना प्रस्तुति दिन नेपाल आउने आयोजकले जनाइएको छ। फतेहीको ‘दिलबर दिलबर’, ‘कुसु कुसु’, ‘ओ साकी साकी’, ‘नाच मेरी रानी’, ‘स्नेक डान्स’ लगायतका गीत भारतसँगै नेपालमा पनि लोकप्रिय छन्।
