काठमाडौँ– सुर्खेतको वीरेन्द्रनगर नगरपालिका–१० बुलबुले टोलमा शनिबार ‎गोली चलेको छ। ‎स्थानीय युवराज रिजालको घरमा बिहान अज्ञात स्थानबाट गोली चलेको बताइएको छ। ‎

उक्त गोली टिनको छाना छेडेर कोठाभित्र खसेको छ। गोली कसले र किन चलायो भन्ने खुलेको छैन। तर, रिजालको घरमा खसेको गोली भान्सामा खस्दा प्लास्टिक र फिउस आल्मुनियमको बाटामा प्वाल पारेको छ।

गोली पड्केको आवाज आएपछि आफूहरु भागेको टीका रिजालले बताइन्। भेटिएको गोली एसएमजी, थ्रि नट थ्रि राइफल र एसएलआर हतियारमा लाग्ने खालको रहेको प्रहरी स्रोतले जनाएको छ।

गोलीको पहिचान र खसेको दिशा पत्ता लगाउन अनुसन्धान अघि बढाइएको ‎जिल्ला प्रहरी कार्यालय सुर्खेतका डीएसपी वीरेन्द्रविर विश्वकर्माले उक्त घटनाबारे अनुसन्धान भइरहेको बताए। ‎‎

‘गोली कताबाट आयो, कसले चलायो यसै भन्न सकिने अवस्था छैन। अनुसन्धान भइरहेको छ।’–उनले भने।