इटहरी– सुनसरीकी ७ वर्षीया बालिकालाई अपहरण गरी बन्धक बनाएको आरोपमा प्रहरीले सप्तरीको कन्चनरुप नगरपालिका– १२ धरमपुरका ३१ वषीय जितेन्द्र साह हलुवाई (जितुवा) लाई पक्राउ गरेको छ।

साहलाई बिहीबार दिउँसो सप्तकोशी पुलको सप्तरी खण्डबाट पक्राउ गरिएको र बालिकाको उद्धार गरिएको जिल्ला प्रहरी कार्यालय सुनसरीका डिएसपी योगराज खतिवडाले जानकारी दिए। प्रहरीका अनुसार सुनसरीको कोशी गाउँपालिका–७, मुसहरीका कुशेश्वर सदाकी छोरी ईशु बुधबार करिव साढे १ बजे घर अगाडि खेलिरहेका बेला अपहरणमा परेकी थिईन।

बालिकालाई एक व्यक्तीले सिटी सफारीमा लिएर गएको खुलेपछि प्रहरीले खोजतलास सुरु गरेको थियो। उनलाई भारत पुर्‍याएको आशंकामा भारतीय प्रहरीसँग पनि समन्वय गरेर खोजतलासमा लागेको प्रहरीले साहलाई पक्राउ गरेको हो।

कोशी गाउँपालिका– ७ का वडाध्यक्ष लालदेव सदाका अनुसार बालिकालाई सिटी सफारीमा हालेर हिडेका साह बेला–बेला गाउँमा जाने गरेका थिए। बुधबार घरमा कोही नभएको मौकामा बालिकालाई लिएर हिडेको उनको भनाई छ।

प्रहरीको अनुशन्धान अनुसार साहले बालिकालाई बुधबार राति राजविराजमा राखेको खुलेको छ। घट्नाको अनुशन्धान भईरहेको प्रहरीले जनाएको छ।