काठमाडौँ– काठमाडौं महानगरपालिकामा विहिबार कार्यालय समयदेखि नै लफडा भयो। उपमेयर लगायतका कतिपय कर्मचारी प्रमुख प्रशासकीय अधिकृत सरोज गुरागाईंलाई कार्यालयमा हाजिर गराउने र मेयर बालेन्द्र साहको निर्देशनमा नगर प्रहरीले गुरागाईँलाई छेक्ने गरेपछि निकै घम्साघम्सी चल्यो।

मेयरको आदेशमा ठूलो संख्यामा नगरप्रहरीहरु परिचालन गरिएको भए पनि कर्मचारीको उल्लेख्य उपस्थिति भएपछि प्रहरी पछि हट्यो। मेयरले ताला लगाएको ढोकै फुटाएर कर्मचारी र केही जनप्रतिनिधिले गुरागाईँलाई कार्यकक्षमा प्रवेश गराए।

कोठाको ढोका फोडेर भित्र प्रवेश गर्नुअघि महानगर प्रहरीले उनीहरुलाई रोकेको थियो। त्यसपछि बालेन्द्रको अनुपस्थितिमा बसेको बैठकले उनलाई हाजिर गराउने निर्णय ग¥यो र ढोका फोरेर प्रमुख प्रशासकीय अधिकृतले १०४ दिनमा हाजिर गरे।

मेयर साह भने त्यस वेला महानगर कार्यालयमा देखिएनन्। उनको खोजी भयो तर फेला परेनन्। उनी महानगरमा लफडा गराएर काभ्रेपलाञ्चोक पुगेको फेला परेको छ। उनी काभ्रेको पाँचखाल नगरपालिकाको केराघारीस्थित एक लस्सी सेन्टरमा पुगेका थिए।

पाँचखाल केराघारी एसएल अर्गानिक कफी एन्ड लस्सी सेन्टरमा पुगेका साह त्यहाँ लस्सी खाएर निस्किएका थिए। उनी बिहान ९–१० बजेको समयमा त्यहाँ पुगेको खुलेको छ। तर, उनी त्यहाँ धेरै समय बसेनन्। त्यहाँबाट कता गए भन्ने पनि खुलेको छैन।

महानगरका कर्मचारीले ३ महिनायता प्रमुख प्रशासकीय अधिकृत नभएकाले तलब पाउन सकेका छैनन्। उपमेयर सुनिता डंगोलले मेयर साहले समस्या निम्त्याएर समाधान दिन नसकेको आरोप लगाएकी छिन्। सामाजिक सञ्जालमा स्टाटस लेखेर भाग्न खोजेको र कर्मचारीको बेवास्ता गरेको उनको आरोप छ। डंगोलले सामाजिक सञ्जालमा लेख्ने मात्र नभएर कार्यालयमै उपस्थित भएर बालेन्द्रले समस्या समाधान गर्नु पर्ने बताएकी थिइन्।