काठमाडौँ– राष्ट्रिय स्वतन्त्र पार्टीका जिल्लास्तरीय नेता एवम् बालकुमारीस्थित सीसीआरसी कलेजका पूर्व निर्देशक डा. राजकुमारसमेत भाटभटेनी सुपरमार्केटमा रक्सी चोरी गरेको आरोपमा पक्राउ परेको खुलासा भएको छ।

अमेरिकाबाट पिएचडी गरेका खोटाङे राई डेढ वर्षअघि रास्वपामा प्रवेश गरेका थिए। उनी निर्वाचन क्षेत्र सभापति एवं जिल्ला कमिटीको पदाधिकारी रहेको खुलेको छ। त्यस अघि उनी नेपाली कांग्रेसको राजनीतिमा सकृय थिए।

४÷५ वर्षअघि सीसीआसी कलेजको निर्देशक बनेका राईले पूर्णकालीन राजनीति गर्ने भन्दै राजिनामा दिएका थिए। अहिले कलेजको निर्देशक देवराज पौडेल छन्।

गत १५ चैतको राजावादी आन्दोलनका राई बिहानैबाट तीनकुने परिसरमा देखिएका थिए। सामाजिक सञ्चालमा सार्वजनिक भएका भीडीओमा उनले हातमा नेपालको झण्डा बोकेर राजसंस्थाको पक्षमा नारा लगाएको पनि देखिन्छ।

आन्दोलन पछि हिंसात्मक घटनामा परिणत हुँदा कोटेश्वरस्थित भाटभटेनी सुपरमार्केटमा लुटपाट मच्चिएको थियो। सोही घट्नामा राई पनि संलग्न रहेको खुलेको छ। उनले विदेशी ब्राण्डको मदिरा चोरेको आरोप छ। प्रदर्शनकारीले भाटभटेनीको मूल गेट नै फोडेर लिपस्टिक, गाजल, कपडा, फ्रिज, टिभी र मोबाइलसम्म चोरेका थिए। कसैले वियरका वोतल र कसैले रेडलेवलका वोतल बोकेर हिडेको भीडीओहरुमा देखिन्छ।

प्रहरीले पक्राउ परेका अन्य ब्यक्तिसँगै राईलाई पनि हिजो ७ दिन म्याद थप गरेर अनुसन्धान गरिरहेको छ।