काठमाडौँ– काठमाडौँको टोखा नगरपालिका–२ झोरमा ४ चैतको राति प्रहरीले पक्राउ गरेको ना ७ ख १६५२ नम्बरको कन्टेनरसहितको २५ करोड रुपैयाँका मालिक माओवादी कार्यकर्ता सिन्धुपाल्चोकको भोटेकोशी गाउँपालिका–४ का ३५ वर्षीय नारायण पौडेल रहेको खुलेको छ।

राजस्व अनुसन्धान विभागको टोलीले करिब १५ दिन लामो अनुसन्धानपछि यो तथ्य वाहिर ल्याएको हो। ट्रकमा लोड गरेको अवस्थामा काठमाडौँ उपत्यका अपराध अनुसन्धान कार्यालयको टोलीले नियन्त्रणमा लिएको उक्त रकम टोखा नगरपालिका–१० महादेवटार हाइटस्थित आफ्नै घरमा बस्दै आएको पौडेलले चीन पठाउँन लागेको अनुसन्धानबाट खुलेको छ।

काठमाडौँबाट युरो र अमेरिकी डलर चीन लगेर उताबाट सुन लिएर आउने योजना देखिएको प्रहरीको प्रारम्भिक अनुसन्धानले देखाएको छ। उनले आफ्नै पालिकाका चालक ३४ वर्षीय कुसाङ लामा (फुच्चे)लाई भरियाको रूपमा प्रयोग गरेका थिए।

अनुशन्धानका क्रममा कन्टेनरमा रकम लोड भएको सीसीटीभ फुटेजसमेत फेला परेको एक अनुसन्धान अधिकृतले बताए। पौडेल फरार छन्। प्रहरीले अनुसन्धान गर्दा उनको अन्तिम लोकेसन समेत टोखामै देखिएको छ। त्यहीबाट उनको मोबाइल स्वीच अफ भएको थियो।

विवावादस्पद पृष्ठभूमिका नारायण माओवादीमा आबद्ध रहेको जानकारहरू बताउँछन्। उनका बाबु दुर्गाप्रसाद प्रधानपञ्च भएका थिए। उनका चार दाजुभाइ छन्। उनीहरु सबै कुनै न कुनै काण्डमा जोडिएका छन्। कोही सुन तस्करी, कोही हुन्डी, कोही विदेशी मुद्रा र कोही रक्तचन्दन तस्करीमा मुछिएका छन्। नारायण माहिलो हुन्।

जेठो ध्रुव पौडेल नेकपा (एमाले) मा आवद्ध छन्। उनी ०५४ सालमा फुल्पिङकट्टीका गाविस अध्यक्षसमेत भएका थिए। ०६९ तिर रक्तचन्दन कारोबारमा जोडिएका उनी पक्राउपछि छुटेका थिए। साइलो बच्चु हिमालय सीमा व्यापार संघका पूर्वअध्यक्ष भइसकेका व्यक्ति हुन्। उनी हुन्डी कारोबारमा पटक–पटक प्रहरी अनुसन्धानको घेरामा परेका शंकास्पद व्यक्ति हुन्।

कान्छो राजकुमार पौडेल भोटेकोशी गाउँपालिकाका अध्यक्षसमेत भइसकेका व्यक्ति हुन्। उनी २०७४ मा नेकपा (माओवादी केन्द्र) बाट अध्यक्ष बनेका थिए। ०७९ को चुनावमा भने उनी कांग्रेसका उम्मेदवारसँग पराजित भएका थिए। राजकुमारविरुद्ध पनि १५ करोडको सुन तस्करी प्रकरणमा मुद्दा चलेको थियो। भाइ बच्चु कांग्रेसमा छन्।

०६० सालतिर कन्टेनर किनेर सामान आयात निर्यात गर्न थालेपछि पौडेल दाजुभाइको आर्थिक हैसियत एक्कासी बढेको जानकारहरू बताउँछन्। पछि उनीहरुले होटलदलेखि क्रसर र हाइड्रोसम्म लगानी गरेको बताइन्छ।

नारायण भने रक्तचन्दन तस्करी, हुन्डीदेखि डलर र सुन तस्करीसम्म जोडिएका छन्। उनी सार्वजनिक छाप दस्तखत कीर्ते र विदेशी मुद्रा अपचलनकै कसुरमा पक्राउ परी धरौटीमा रिहा भएका थिए। उनकी श्रीमतीको मृत्यु भइसकेको छ। उनका एक छोरा र एक छोरी छन्।