काठमाडौँ– गत १५ चैतको राजावादी आन्दोलनका चर्चित घट्नाक्रम मध्ये एक हो– कोटेश्वरस्थित भाटभटेनी सुपरमार्केटमा लुटपाट र सुरक्षा गार्डले लुटेरालाई भाटा हानेको काण्ड।

लुटेरालाई त्यसरी भाटा हान्ने सुरक्षा गार्ड हुन– दुल (कृष्ण) प्रसाद पराजुली। उनलाई सुपरमार्केटका सञ्चालक मीनबहादुर गुरुङले बुधबार पुरस्कृत गरेका छन्। गुरुङले एक कार्यक्रमबीच पाँच लाख एक हजार एक सय एघार रुपैयाँसहित पुरस्कार र पाँच ग्रेड बढुवाको सम्मान प्रदान गरे।

उनले लुटपाट गर्न पुगेका प्रदर्शनकारीको प्रतिकार गरी ठूलो क्षति हुनबाट जोगाएका थिए। यद्यपी राजावादीको हिंसात्मक प्रर्दशनका क्रममा तोडफोड तथा लुटपाट हुँदा ८० लाख भन्दा बढीको क्षति भएको सो कम्पनीले जनाएको छ।

सम्मान कार्यक्रपछि पराजुलीलाई केही बोल्न आग्रह गरिएको थियो। उनले २२ वर्षदेखि भाटभटेनीमा जागिर खाएको र घर–गाडी जोडेको सुनाए। ‘त्यो दिन आतंककारी आए। ढुंगामुढा गर्न थाले। ज्यान त जोगाउनुप¥यो भनेर साइड लागेर बस्यौँ। हामी साइडमा बस्दाखेरी उनीहरू सबै पसेर लुट्न थाले’ पराजुलीले भने–‘फलफूल, बियरका बोतल, वाइन, राइसकुकर फ्रिज सबै लिएर गए। लौ भएन भनेर हामी सबैजना टिम मिलेर यता आयौँ। अरू भित्रबाट लखट्ने, म चाहिँ बाहिर बसेर ड्याङ् कि ड्याङ हान्ने। बाहिर म एक्लै भए पनि डर लागेन।’