काठमाडौँ– गत १५ चैतमा काठमाडौंको तीनकुनेमा भएको राजावादीहरूको प्रदर्शनमा मृत्यु भएका पत्रकार सुरेश रजकको एक्स–रे भएको छ। रजकको शरीरमा गोली लागेको हल्लापछि एक्स–रे गरिएको हो।

केही मिडिया तथा सामाजिक सञ्जालमा पत्रकार रजकलाई गोली लागेको भन्दै समाचारहरु सार्वजनिक भएपछि चिकित्सकले एक्स–रे नगरी पोस्टमार्टम नगर्ने अडान लिएका थिए। त्यसपछि उनको पुरै शरीरको एक्स–रे गरिएको हो।

रजकको शव त्रिवि शिक्षण अस्पतालमा राखिएको छ। चिकित्सकहरूका अनुसार उनको एक्सरेको रिपोर्ट आउन बाँकी छ। उक्त रिपोर्ट आएपछि आज (बुधबार) बिहान १० बजेबाट पोस्टमार्टम थालिने एक चिकित्सले जानकारी दिएका छन्।

सोही घट्नामा मृत्यु भएका सविन महर्जनको भने पोस्टमार्टम भइसकेको छ। प्रहरी स्रोतका अनुसार उनको दायाँ हातको कुहिनो नजिकको भागबाट कोखा हुँदै ढाडबाट गोली निस्केको पाइएको छ।