जनकपुर– दिनहुँ सोधखोज गरेर हैरान पारेको छर तर समस्याको समाधान भने नखोजेको भन्दै कैदीवन्दीले नारावाजी गर्दा मंगलबार पर्साको वीरगन्जस्थित बाल सुधारगृह तनावग्रस्त बनेको छ।

सुधार गृहमा आश्रित बाल कैदीबन्दीले दिउँसो १२ बजेदेखि आधा घण्टा बार्दलीमा भेला भएर नाराबाजीसहित प्रदर्शन गरे। सुधार गृह स्रोतका अनुसार सोमबार मधेश प्रदेश महान्यायाधिवक्ता कार्यालय तथा मंगलबार बिहान जिल्ला सरकारी वकिलको कार्यालयबाट कर्मचारीहरु सोधपुछका लागि पुगेका थिए।

त्यसपछि ‘समस्या बुझेर जाने तर आधारभूत आवश्यकतासमेत पूरा गर्न नसक्ने’ भन्दै आक्रोशित भएका थिए।

बालकैदीवन्दीले नारावाजी गर्न थालेपछि सीडीओ गणेश अर्याल, एसपी गौतम मिश्र, डीएसपी किशोर लम्साल, सशस्त्र प्रहरीका डीएसपी देवेन्द्रबहादुर सिंह लगायतका सुरक्षा अधिकारी तत्कालै त्यहाँ पुगेका थिए।

त्यसक्रममा बालकैदीबन्दीले ठाउँ साघुरो भएको, पंखा तथा खानेपानीको उचित व्यवस्थापन नभएको, पढ्ने तथा मनोरञ्जनका सामग्री नभएको लगायतका गुनासो गरे। त्यसपछि सीडीओ र एसपीले बाल कैदीबन्दीको माग सामान्य रहेको र एक साताभित्रै माग पूरा गर्न पहल गर्ने प्रतिबद्धता जनाएका थिए।

सुधार गृहका निमित्त प्रमुख कृष्णप्रसाद साहका अनुसार ५० जना क्षमता भएको भवनमा हाल १ सय २७ बाल कैदीबन्दी रहेको जानकारी दिए। गत वर्ष यही सुधार गृहमा २ पक्षबीच झडप भएको थियो।