हेटौंडा— मकवानपुरको इलाका प्रहरी कार्यालय पालुङको पेस्तोल लागु औषध कारीबारीले लुटेका छन्। प्रहरी हवल्दार अर्जुन तामाङ र सहायक हवल्दार गोविन्द्र मग्रातीको साथमा रहेका पेस्तोल कैलाश गाउँपालिका–६ दुम्सीखर्कको जंगलमा लुटिएको हो।

प्रहरीका अनुसार अफिमको कारोबार भइरहेको जानकारी पाएपछि इलाका प्रहरी कार्यालय पालुङका हवल्दार अर्जुन तामाङ र सहायक हवल्दार गोविन्द्र मग्राती कैलाश गाउँपालिका–६ दुम्सीखर्कको जंगलमा पुगेका थिए।

प्रहरीलाई देखेपछि लागु औषध कारोबारीहरु २ केजी अफिम र मोटरसाइकल छाडेर भागेका थिए। उक्त अफिम र मोटरसाइकल लिएर इलाका प्रहरी कार्यालय पालुङतर्फ फर्कदै गरेका बेला अफिम कारोवारीले करिव १५ जनाको समुह बनाएर प्रहरीलाई घेरा हाले।

त्यसपछि तामाङ र मग्रातीलाई कुटपिटसमेत गरेर ७ राउन्ड गोली लोड भएको टाइप–५४ को पेस्तोल लुटेको जिल्ला प्रहरी कार्यालय मकवानपुरले जनाएको छ। यद्यपी, रातभरको खोजतलासपछि पेस्तोल फेला परेको एसपी विश्वराज खड्काले बताए।

कैलाश गाउँपालिका–१ वोलने लेकको जंगलमा फालेको अवस्थामा गोलीसहित पेस्तोल फेला परेको उनको भनाई छ। पेस्तोल लुटेरा र पेस्तोलको खोजीमा जिल्ला प्रहरी कार्यालय मकवानपुरका डीएसपी श्यामु अर्यालको नेतृत्वमा ६५ जना प्रहरी सोमबार बेलुकादेखि त्यस क्षेत्रमा परिचालन थिए।