काठमाडौँ– काठमाडौँको तीनकुनेमा शुक्रबार भएको राजावादी समूहको आन्दोलनका फिल्ड कमाण्डर दुर्गा प्रसाईंका अर्का एक सहयोगी देवी संग्रौला पक्राउ गरेका छन्।

झापा घर भएका देवी संग्रौलालाई काठमाडौँ उपत्यका अपराध अनुसन्धान कार्यालयले ललितपुरको भैंसेपाटीबाट पक्राउ गरेको हो। उनी दुर्गा प्रसाईंको संयुक्त जनआन्दोलन घोषणा सभा परिचालन समितिका संयोजक हुन।

विभिन्न संस्था तथा पार्टीका तर्फबाट राजावादीहरूले संयुक्त आन्दोलन गर्न परिचालन समिति बनाएका थिए। प्रसाईंले आफनो तर्फबाट समितिमा संग्रौलालाई सामेल गराएका थिए।

तीनकुनेमा भएको हिंसात्मक प्रदर्शनमा उनको संलग्नता रहेको प्रहरीले जनाएको छ। यसअघि प्रसाईंको सुरक्षा दस्ताका ४ जना पनि पक्राउ परिसकेका छन्।

तीनकुनेमा दुई जनाको ज्यान लिएको, विभिन्न कार्यालय तथा निजी सम्पत्तिमा आगजनी र तोडफोड गरेको, लुटपाट गरेको लगायतका कसुरमा प्रहरीले पहिलोपटक आइतबार ४१ जनाविरुद्ध अदालतबाट म्याद लिएर अनुसन्धान अगाडि बढाइसकेको छ।

यसरी पक्राउ पर्नेमा राप्रपाका वरिष्ठ उपाध्यक्ष रवीन्द्र मिश्र र महामन्त्री तथा सांसद धवलशमशेर राणासहित छन्। कमान्डर प्रसाईं भने त्यसै दिन कार्यक्रम नसकिँदै फरार भएका थिए। अहिलेसम्म प्रहरीले उनलाई पक्राउ गरेको छैन।