काठमाडौँ– काठमाडौँको तीनकुनेमा आयोजित राजावादी आन्दोलनका क्रममा पक्राउ परेका ४१ जना मध्ये सप्तरी, उदयपुर र सुनसरीका पनि सर्वसाधारण परेका छन्। उनीहरु सवैलाई प्रहरीले अदालतमा उपस्थित गराई अनुसन्धान गर्न ५ दिन थुनामा राख्न म्याद लिएको छ।

काठमाडौं जिल्ला अदालतकी न्यायाधीश तारादेवी महर्जनको इजलासले ४१ जनालाई पाँच दिन थुनामा राखेर अनुसन्धान गर्न अनुमति दिएको हो।

पक्राउ पर्नेमा सप्तरीको सप्तकोशी नगरपालिका–१ फत्तेपुर घर भई भक्तपुरको मध्येपुर ठिमी नगरपालिका–४, गाम्छामा वस्दै आएका ३० वर्षीय आलोक पराजुली (अशोक), उदयपुरको बेलका नगरपालिका–१ घर भई गाम्छामै बस्ने ३६ वर्षीय नबिन ढकाल, सुनसरीको वराहक्षेत्र नगरपालिका– ५, लक्ष्मीपुर घर भई भक्तपुरको मध्येपुर ठिमी नगरपालिका–५ बस्ने ४२ वर्षीय सन्तोष चौधरी र धरान उपमहानगरपालिका–२ घर भई काठमाडौँ महानगरपालिका –३२, कोटेश्वर वस्ने ४२ वर्षीया ऐलिसा राई छन्।

१५ चैतमा राजावादीले गरेको प्रदर्शनले हिंसात्मक रुप लिँदा एक जना पत्रकारसहित दुई जनाको मृत्यु भएको थियो भने कैयौ घाइते भएका थिए। सोही घटनामा पक्राउ परेकाहरुलाई हिरासतमा राखेर अनुसन्धान गर्न अनुमति दिइएको काठमाडौं प्रहरी परिसरका प्रवक्ता अपिलराज बोहोराले बताए।

यस्तै राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्र, सांसद धवल शमशेर राणासहित ११ जनालाई राजद्रोह र संगठित अपराधमा अनुसन्धान गर्ने प्रहरीले जनाएको छ।