विद्युत प्राधिकरणमा हितेन्द्रको इण्ट्रीसँगै कुलमान निकट कर्मचारी तितरवितर, आफु अनुकुलको टिम तयार
शीर्ष खबर 
काठमाडौं– कुलमान घिसिङलाई हटाएर सरकारले नियुक्त गरेका नेपाल विद्युत प्राधिकरणका कार्यकारी निर्देश हितेन्द्रदेव शाक्यले उपकार्यकारी निर्देशक र निर्देशकहरुसहित धेरै कर्मचारीको सरुवा गरेका छन्।
शाक्यले आफू अनुकुलको टिम बनाउन १२ औं तहका प्रसारणलाइन निर्देशनालयमा कार्यरत दीर्घायु कुमार श्रेष्ठलाई वितरण तथा ग्राहक सेवा निर्देशनालयमा सरुवा गरेका छन्। नेकपा एमाले निकट मानिने श्रेष्ठलाई प्राधिकरणको ‘ब्याक बोन’ मानिने वितरण तथा ग्राहक सेवा निर्देशनालयमा सरुवा गरिएको हो। यो निर्देशनालयले गर्ने कामले प्राधिकरणको पर्फर्मेन्स देखिने जानकारहरु वताउँछन्। मनोज सिलवालले अवकास पाएपछि यो निर्देशनालय रिक्त थियो।
यसैगरी एलडीसी (लोड डिस्प्याच सेन्टर) प्रमुखका रुपमा कार्यरत चन्दन घोषलाई सरुवा गरेर त्यहाँको जिम्मेवारी रञ्जु पाण्डेललाई दिइएको छ। घिसिङ एमडी हुँदा प्राधिकरणको प्रवक्ता समेत रहेका घोषलाई प्राधिकरणको प्रणाली योजनामा सरुवा गरिएको छ। प्रवक्ताको जिम्मेवारी राजाभाई शिल्पकारले पाएका छन्।
यता, चुहावट नियन्त्रण महाशाखामा कार्यरत प्राधिकरणका निर्देशक टेकनाथ तिवारीलाई बागमती प्रदेशको प्रमुखमा सरुवा गरिएको छ भने त्यहाँ रहेका नवराज ओझालाई ऊर्जा दक्षता तथा चुहावट नियन्त्रण विभाग सरुवा गरिएको छ।
विद्युत प्राधिकरणको सञ्चालक समितिको बैठकले १० औं तह र त्यसमाथिको नियुक्ति, पदस्थापन तथा सरुवाको अधिकार प्रबन्ध निर्देशकबाट खोसेको छ।
