काठमाडौँ– राजसंस्था पुनस्र्थापना निम्ति ‘जनआन्दोलन’ समितिका फिल्ड कमान्डर दुर्गा प्रसाईं भागेर भारत पुगेको खुलेको छ। नेपाल प्रहरीका एक उच्च अधिकारीका अनुसार प्रसाईँ चितवनको ठोरी हुँदै भारत पुपेका हुन।

१५ चैतमा काठमाडौँको तीनकुनेमा हिंसात्मक प्रदर्शन मच्चाएर उनी इमाडोल पुगेका थिए। त्यहाँबाट मोवाईल स्विच अफ गरी भुमिगत भएका प्रसाईं भारत पुगेको ती अधिकारीले बताए। प्रदर्शन उत्तेजित बनाएको आरोपपछि पक्राउ गर्ने सरकारी तयारीबीच उनी काठमाडौं छाडेर भारत हानिएको प्रहरीको भनाइ छ।

शुक्रबार (चैत १५) राति नै उनी काठमाडौं छाडेर भारततर्फ लागेको प्रहरी जनाएको छ। प्रदर्शन हिंसात्मक बनेलगत्तै उनी ललितपुरको इमाडोलस्थित आफ्ना गुरु पुस्कर खतिवडाको घर पुगेका थिए। त्यहाँ फलफूल खाएर सोही राति उनी ललितपुरको फर्सीडोल हुँदै चितवनको ठोरी रुटबाट भारत गएको प्रहरी दाबी छ।

प्रसाईं ललितपुरको कान्ति लोकपथको विभिन्न बाटोहरू प्रयोग गरेर चितवनको ठोरी पुगेर भारत पसेको देखिएका अनुशन्धानमा संलग्न एक प्रहरीले वताए। प्रसाईं भारत पुगेको सूचनालगत्तै प्रहरीका केही अधिकारीले त्यहाँको सहयोगमा उनलाई पक्राउको आन्तरिक तयारी सुरु गरेका छन्।

नेपाल प्रहरीको केन्द्रीय अनुसन्धान ब्युरो (सीआर्ईबी)को टोलीले भारतीय प्रहरीसँग समन्वय थालेको छ। प्रसाईंले भने आइतबार दिउँसो भिडियो सन्देश जारी गर्दै आफू काठमाडौंको एक मन्दिरमा सुरक्षित रहेको बताएका थिए।

राजावादीको प्रदर्शनक्रममा पत्रकार सुरेश रजक र कीर्तिपुरका सविन महर्जनले ज्यान गुमाएका छन्। प्रदर्शनक्रममा दर्जनौँ सवारीसाधन, सार्वजनिक सम्पत्ति, निजी घरमा तोडफोड, आगजनी र भाटभटेनी सुपरस्टोरमा लुटपाट समेत गरिएको थियो।