फेसबुकको सहयोग नपाउँदा दुर्गा प्रसाईँलाई पक्राउ गर्न नसकिएको प्रहरीको दावी
शीर्ष खबर 
काठमाडौँ– काठमाडौँको तीनकुने क्षेत्रमा शुक्रबार भएको राजावादीहरूको आन्दोलनका कमान्डर दुर्गा प्रसाईंलाई फेसबुकले सहयोग नगर्दा पक्राउ गर्न नसकिएको प्रहरीले जनाएको छ।
शुक्रबार इमाडोलबाट भुमिगत भए पनि सामाजिक सञ्जालमा सकृय रहेका प्रसाईलाई तीन दिनसम्म पनि पक्राउ गर्न नसकिएको विषयमा प्रष्टिकरण दिँदै प्रहरीले यस्तो बताएको हो।
शुक्रबार आन्दोलनबाट निस्किएर ललितपुरको इमाडोल पुगेका प्रसाईं त्यहाँबाट भूमिगत भएका थिए। आइतबार सामाजिक सञ्जाल फेबसुकमा भिडियो पोस्ट गर्दै उनले आफू काठमाडौंकै एक मन्दिरमा बसेको बताए।
आफूलाई भेटेलगत्तै गोली हान्न प्रधानमन्त्री केपी ओलीले निर्देशन दिएकाले सुरक्षाका लागि लुक्नुपरेको दाबी गरेका उनलाई पक्राउ गर्न शुक्रबार साँझदेखि प्रहरीका विशेष टोलीहरू परिचालित भएका छन्।
उनको मोवाईल स्विच आफ छ। सामाजिक सञ्जालका आधारमा प्रहरीले उनलाई ‘ट्रयाक’ गर्न सकेको छैन। ‘फेसबुक ट्रयाक गर्न मेटा कम्पनीले नै सघाउनुपर्ने भएकाले सम्भव नभएको एक प्रहरी अधिकारी बताउँछन्। नेपालमा मुटाको कार्यालय नभएकाले विवरण उपलब्ध नहुँदा प्रसाईँलाई पक्राउ गर्न गाह्रो भइरहेको उनको भनाई छ।
आन्दोलतका दिनमा पनि उनले आफैँ गाडी चलाएर प्रहरीलाई पेल्दै र अश्लिल गाली गर्दै निषेधित क्षेत्र तोड्नुका थिए। त्यसपछि उत्तेजित भएका आन्दोलनकारी तोडफोड र आगजनीमा उत्रिएका थिए। उनले योजनाबद्ध रूपमा आन्दोलनलाई हिंसात्मक बनाएको प्रहरीको दाबी छ।
प्रसाईले भने आफनो उदेश्य प्रहरीलाई चोट पुर्याउनु नभएको भन्दै माफीसमेत मागेका छन्।
