विराटनगर— इलामको फाकफोकथुम गाउँपालिका–३ आमचोक (सल्लेरी) की १९ वर्षीया बिमला कट्टेल २९ फागुनको साँझदेखि अचानक हराईन। उनको खोजविन सुरु भयो। फेला नपरेपछि श्रीमती हराएको भन्दै २० वर्षीय उमेश गिरी १ चैतमा निवेदन बोकेर प्रहरी चौकी आमचोक पुगे।

उनको निवेदनमा गर्भवती अवस्थामा रहेकी श्रीमती हराएकोले खोजी गरी पाउँन माग गरिएको थियो। प्रहरीले उमेशसँग सामान्य सोधपुछ गरेर बिमलाको खोजी सुरु गर्यो। खोजतलासकै क्रममा १५ चैतमा घरदेखि डेढ घन्टाको पैदल दूरीमा उनको शव फेला पर्यो।

बिमलाको शव धार्नेखोपस्थित कच्ची सडकको माझमा करिब ५ फिट गहिरो खाल्डो खनेर गाडिएको अवस्था भेटिएको प्रहरीले जनाएको छ। घट्नाको अनुशन्धानका क्रममा भने आश्चर्यजनक तथ्य वाहिर आएको छ। जिल्ला प्रहरी कार्यालय इलामका एसपी एकनारायण कोइरालाका अनुसार ९ महिनाकी गर्भवती बिमलाको हत्या गरेर उमेशले नै गाडेको खुलेको छ।

१२ चैतमा उमेश पक्राउ परेका छन्। उमेश एक्स्काभेटर चालक हुन। उनले नै बिमलालाई घुम्न जाऔं भनेर धार्नेखोप पुर्याएका थिए। त्यहाँ पु¥याएपछि मुक्का प्रहार गरी लडाएर घाँटी थिचेर हत्या गरेको उनले वयान दिएका छन्। हत्या गरेपछि एक्स्काभेटरले नै खाल्डो खनेर गाडेको अनुसन्धानमा खुलेको छ। उनकै बयानका आधारमा प्रहरीले विमलाको शव फेला पारेको हो।

श्रीमतीको हत्याको कारण भने विवाहेत्तर सम्बन्ध भएको देखिएको छ। यस विषयमा भने प्रहरीले धेरै कुरा खुलाएको छैन। एसपी कोइरालाका अनुसार उनीहरुले एक वर्ष अघि मात्रै विवाह गरेका थिए।