काठमाडौँ– राजावादी आन्दोलनका क्रममा शुक्रबार पेस्तोल लिएर निस्किएका एक ब्यक्तिलाई लिएर अहिले नानाथरी अड्कलबाजी भईरहेको छ। कसैले आन्दोनलमा प्रहरीले घुसपैठ गराएको भनिरहेका छन् भने कसैले पूर्वमाओवादी लडाकु भण्डै लख काटिरहेका छन्।

तर, पेस्तोल बोक्ने ती ब्यक्ति सिभिल पुलिस भएको खुलेको छ। उनी प्रहरीको लागु औषध ब्युरोबाट खटिएका असई भएको प्रहरी स्रोतले जनाएको छ। स्रोतका अनुसार लागुऔषध ब्युरोका प्रहरीहरू प्राय सादा पोसाकमै हुन्छन्।

प्रहरीले दिएको जानकारी अनुसार आन्दोलनका क्रममा खिचिएको त्यो तस्वीर कोटेश्वर क्षेत्रको हो। प्रहरीको भ्यानमा आगजनी गरेका प्रदर्शनकारी लागुऔषध ब्युरोको कार्यालयमा समेत पस्न खोजेका थिए। त्यसपछि सादा पोसाकमा रहेका ब्युरोका अधिकारीले पेस्तोल निकालेर ताकेका थिए।

तर, प्रदर्शनकारीले आक्रमण गरेपनि उनीहरुले गोली चलाएनन्। उनीहरू आफैं त्यहाँबाट भागेका थिए। कोटेश्वरमा राजावादीले जलाएको गाडी पनि आफूहरूकै भएको ब्युरोका प्रवक्ता एवं एसपी नारायण अधिकारीले जानकारी दिए।

ब्युरोका अधिकारी सवार गाडीमाथि आगजनी गरिएपछि उनीहरूलाई तर्साउन पेस्तोल निकालिएको उनले बताए।