काठमाडौँ– एक महिनाअघि काभ्रेको बनेपा नगरपालिका–८ स्थित होटल भ्यु एण्ड पाहुना घरमा एक युवतीको हत्या गरेर भागेको आरोप लागेका २७ वर्षीय युवकलाई प्रहरीले पक्राउ गरेको छ।

रामेछापको खाँडादेवी गाउँपालिका–२ का भरत बुढाथोकीलाई पर्साको विरगन्ज महानगरपालिका–१६ स्थित विरगन्ज भन्सार कार्यालयको गेट अगाडिबाट पक्राउ गरिएको हो। १४ चैतमा भारतको रक्सौलबाट नेपालको विरगन्जतर्फ आउँदै गरेको अवस्थामा बुढाथोकीलाई पक्राउ गरिएको इलाका प्रहरी कार्यालय बनेपाले जनाएको छ।

डीएसपी ज्ञानबहादुर खड्काका अनुसार बुढाथोकीमाथि रामेछाप घर भइ काभ्रेपलाञ्चोकको बनेपा नगरपालिका–६ बुडोल बस्ने २३ वर्षीया शर्मिला श्रेष्ठको हत्या गरेको आरोप छ। श्रेष्ठ १५ फागुनमा होटलको कोठा नम्बर ११५ मा मृत अवस्थामा फेला परेकी थिइन्। उनी बनेपाकै एक मेडिकलमा कार्यरत थिइन।

घटनाको अनुसन्धानपश्चात प्रहरीले फरार रहेको अभियुक्तको खोजी तीव्र पारेको थियो। पक्राउ परेका बुढाथोकीलाई काभ्रेपलाञ्चोक जिल्ला अदालतमा उपस्थित गराई अनुशन्धानका लागि ५ दिनको म्याद लिईएको डीएसपी खड्काले वताए।