काठमाडौँ– तीनकुने प्रदर्शनका कारण देश छोडेर भाग्ने तयारीमा लागेको सुँईको पाएपछि सरकारले पूर्व राजा ज्ञानेन्द्र शाहको राहदानी (पासपोर्ट) रद्द गर्ने तयारी थालेको छ।

गृहमन्त्रालय उच्च स्रोतका अनुसार उनी विदेश भाग्ने तयारीमा रहेको सुराकी पाएपछि पासपोर्ट रद्द गर्ने प्रक्रिया अघि बढाइएको हो। शुक्रबारको हिंसात्मक आन्दोलनका लागि राजावादीहरूलाई उनैले उक्साएको सरकारको ठम्याइ छ।

पूर्वराजाले आन्दोलनको अघिल्लो दिन दुर्गा प्रसाईं र नवराज सुवेदीलाई भेटेर हिंसात्मक आन्दोलनको निर्देशन दिएको सरकारको दाबी छ। पूर्वराजाको संलग्नताबारे सरकारले अनुसन्धान थालेपछि उनी विदेश भाग्ने आशंका रहेकोले राहदानी रद्द गर्ने प्रक्रिया अघि बढेको हो।

‘हिजोको हत्या, आगजनी र लुटपाटको फिल्ड कमाण्डर दुर्गा प्रसाई हुन तर उसलाई अघिल्लो दिन बोलाएर निर्देशन दिने तथा आर्थिक स्रोत जुटाउने व्यक्ति ज्ञानेन्द्र शाह हुन् भन्ने पुष्टि भइसकेको छ।’ स्रोतले भन्यो।

ज्ञानेन्द्रलाई कारवाही गर्न विपक्षी दलहरुबाट पनि सरकारलाई दबाब बढिरहेको छ। यस्तोमा उनी अनुसन्धान थालिएपछि विदेश भाग्न सक्ने आशंकामा पासपोर्ट रद्द गर्न लागिएको हो। प्रदर्शनलाई हिंसात्मक बनाएर प्रसाईँ पनि फरार भएका छन्।