काठमाडौँ– विवादास्पद राजावादी धर्मगुरु पुष्कर खतिवडा पक्राउ परेका छन् भने उनकै घरमा लुकेका मेडिकल व्यवसायी दुर्गा प्रसाईँ भने अझै फरार छन्।

तीनकुनेको हिंसात्मक आन्दोलनमा खतिवडाले ढुंगामुढा गरेको फोटो तथा भीडीओहरु सार्वजनिक भएपछि प्रहरीले उनलाई शनिवार बिहान पक्राउ गरेको हो। उनी इमाडोलस्थित एक घरमा लुकेको अवस्थामा पक्राउ परेका हुन।

यता, तीनकुनेको हिंसात्मक झडपपछि भागेका प्रदर्शनका कमाण्डर दुर्गा प्रसाईंलाई प्रहरीले खोजिरहेको छ। उनी शुक्रबार तीनकुनेबाट फरार हुनुअघि धर्मगुरू खतिवडासँगै भागेको खुलेको छ।

इमाडोलस्थित घरमा केहीबेर बसेर प्रसाईं त्यहाँबाट पनि फरार भएका हुन्। ‘दुबै जना सँगै इमाडोल आएका रहेछन्। केहीबेरमा निस्किएको भन्ने छ। एउटा स्याउ र केरा खाएर निस्किएका रहेछन्।’–जिल्ला प्रहरी परिसर ललितपुरका एसएसपी श्यामकृष्ण अधिकारीले भने।

उनका अनुसार मोवाईल स्विचअफ गरेर फरार भएका प्रसाईँको मोबाइलको अन्तिम लोकेशन गैरीगाउँ देखिएको थियो। उनले आफूलाई जहाँ बोलाएपनि हाजिर हुन तयार हुने भन्दै सामाजिक सञ्चालमा लेखेका थिए भने आफु नभाग्ने भन्द मिडियालाई अन्तरवर्ता दिएका थिए। तर अहिले सम्पर्कबिहीन भएका छन्।