काठमाडौँ– राजा फर्काउने आन्दोलनका नाममा शुक्रबार काठमाडौँको तीनकुनेमा भएको अराजक र हिंसात्मकत गतिविधिपछि प्रहरीले राष्ट्रिय प्रजातन्त्र पार्टीका बरिष्ठ उपाध्यक्ष रवीन्द्र मिश्र, महामन्त्री धवलशमशेर राणा र स्वागत नेपालसहित ५५ जनालाई पक्राउ गरको छ।

राजावादीहरूले तिनकुने क्षेत्रमा हिंसात्मक प्रदर्शन गर्दा एक पत्रकारसहित दुई जनको मृत्यु भएको छ। नेपाल प्रहरीका ५३ जना, सशस्त्र प्रहरी बलका २२ र प्रदर्शनकारीतर्फ ३५ जना घाइते भएका छन।

यसैगरी ९ वटा सरकारी सवारी साधन, ६ वटा सरकारी वा निजी नखुलेका सवारी साधनमा आगजनी भएको छ। विभिन्न १४ स्थानमा आगजनी भएको, ९ वटा संस्थामा तोडफोड र एक स्थानमा लुटपाट भएको जिल्ला प्रहरी परिसरका प्रहरी उपरीक्षक अपीलराज बोहराले जानकारी दिए।

यही घट्नामा मिश्र, राणा र नेपाललगायतका केही व्यक्तिलाई पक्राउ गरिएको नेपाल प्रहरीका प्रवक्ता दिनेशकुमार आचार्यले जानकारी दिए। मिश्र र राणालाई सातदोबाटो र नेपाललाई पुतलिसडकबाट पक्राउ गरिएको हो।

राणाको नेतृत्वमा १ हजार १११ सदस्यीय जनआन्दोलन परिचालन समिति गठन गरी प्रदर्शनमा परिचालित भएका थिए। मिश्र, राणा र नेपालले राजावादीको नाममा गरिएको तीनकुनेस्थित प्रदर्शनमा अगुवाई गरेका थिए।

राजावादीको आन्दोलनमा प्रदर्शनकारीलाई उक्साएर आन्दोलन हिंसात्मक बनाएका आन्दोलनका कमान्डर व्यवसायी दुर्गा प्रसाईं फरार छन्। आन्दोलन हिंसात्मक हुन थालेपछि उनी एउटा सटरभित्र लुकेर बसेका थिए। पछि उनी एक निजी गाडीमा चढेर तीनकुनेबाट भागेका थिए। उनलाई लिन बीएबी ४२०८ नम्बरको गाडी पुगेको थियो। त्यस यता उनी फरार छन्। तर, राति अबेरसम्म उनले सामाजिक सञ्जालमा भने अपडेट गरिरहेका थिए।

महानगरीय प्रहरी परिसर काठमाडौंका प्रमुख एसएसपी विश्वराज अधिकारीले प्रसाईँलाई पक्राउ गर्न प्रहरी परिचालन भएको बताएका छन्। उनले शुक्रबारको घटनाको मुख्य योजनाकार प्रसाईँ नै भएको विभिन्न प्रमाणमा देखिएको बताए।

राजसंस्था पुनस्र्थापनाका लागि गठन गरिएको संयुक्त जनआन्दोलन समितिका संयोजक नवराज सुवेदी वृद्ध भएका कारण उनलाई घरमै नजरबन्दमा राखिएको छ। तर, विश्लेषकहरुले भने यसमा सुरक्षा निकायको पनि चुक देखिएको वताएका छन्।

उनीहरुका अनुसार दुर्गा प्रसाईंसहितका राजावादी नेताहरूको आन्दोलन भड्काउने तयारीबारे सुरक्षा निकायलाई पूर्वसूचना थियो। योजना थाहा पाएरै प्रहरीले सुरुमा सकेसम्म बल प्रयोग नगर्ने नीति बनाएको थियो। गृह मन्त्रालयले नै अन्तिम अवस्थामा मात्र गोली चलाउन निर्देशन दिएको थियो।

तर, प्रहरीले बल प्रयोग गर्ने वेलासम्म आन्दोलन भड्किएर नियन्त्रणबाहिर पुग्यो। निजी घर र व्यावसायिक भवन, दलको कार्यालय, सरकारी र निजी सवारीसाधन, जडीबुटी उत्पादन तथा प्रशोधन केन्द्र, कोटेश्वरस्थित भाटभटेनीमा लुटपाट लगायतका अधिकांश घट्नामा प्रहरीको उपस्थिती देखिएन।

कतिपय स्थानमा खटिएका प्रहरी आफैँ असुरक्षित भए। कोटेश्वरको प्रहरी कार्यालयमा तोडफोड हुँदा पनि प्रहरीले कुनै एक्सन लिन सकेन। कोही आन्दोलनकारीको मृत्यु भयो भने अवस्था भड्किन सक्छ भनेर गृह मन्त्रालयले बल प्रयोग नगर्न दबाब दिएका कारण यस्तो अवस्था आएको पूर्व प्रहरी प्रमुखहरु वताउँछन्।

प्रहरीलाई निष्पक्ष रूपमा काम गर्न नदिँदाको परिणाम शुक्रबारको घटना भएको एक पूर्वप्रहरी अधिकारीले बताए।