काठमाडौँ — तीनकुनेको राजावादी प्रर्दशनमा प्रहरीको गोली लागी घाइते भएका एक जनाको त्रिवि शिक्षण अस्पतालमा मृत्यु भएको छ।

प्रहरीको गोली लागेका ३ जनामध्ये घाँटीमा गोली लागेका कीर्तिपुर नगरपालिका– ४ का २९ वर्षीय सविन महर्जनको मृत्यु भएको हो। उनको शव महाराजगञ्जस्थित त्रिवि शिक्षण अस्पतालमा राखिएको छ। प्रदर्शनमा घाइते भएका उनलाई तत्काल उपचारका लागि टिचिङ अस्पताल पुर्‍याइएको थियो।

उपचारका क्रममा उनको मृत्यु भएको हो। त्रिवि शिक्षण अस्पतालका निर्देशक डा. सुबास आचार्यका अनुसार उनलाई घाँटीमा गोली लागेको थियो। मृतकको शव प्रहरीको समन्वयमा पोस्टमार्टमका लागि फरेन्सिक विभागमा पठाइएको छ।

यसैगरी, राजावादी समुहले आगो लगाएको तीनकुनेस्थित घरमा जलेर एक जना पत्रकारको मृत्यु भएको छ। सो भवनको छतमा चढेर टेलिभिजनका लागि दृष्य खिचिरहेका सुरेश रजकको मृत्यु भएको हो। राजावादीहरुले तीनकुनेमा गरेको प्रदर्शनमा प्रहरीसँग झडप भएपछि एक भवनमा आगजनी भएको थियो। सो घटनालगत्तै रजक सम्पर्कविहीन भएका थिए।

तीनकुनेमा भएको आन्दोलनमा प्रहरीले सुरुमा अश्रुग्यास प्रहार गरेको थियो भने पछि रबरको गोली र हवाइ फायर पनि गरेको थियो।

प्रदर्शनकारीहरुले प्रहरीको बन्दुक नै खोसेको र सांघातिक आक्रमण गरेका थिए। ति दृश्यहरु सामाजिक संजालमा सार्वजनिक भएका छन्। प्रदर्शनकारीले व्यक्तिका घर, पसल, सञ्चार गृह र सरकारी सम्पत्तिमा आगजनी गरेका थिए।

कोटेश्वरस्थित जडीबुटी उत्पादन तथा प्रशोधन कम्पनी लिमिटेडको कार्यालयमा आगजनी र कोटेश्वरस्थित भाटभटेनीमा तोडफोड र लुटपाट भएको छ।

राजावादी आन्दोलन अराजक हुँदै हिंसात्मक भएपछि स्थानीय प्रशासनले निषेधाज्ञा नै जारी गरेको छ।

प्रशासनले राजावादीहरूलाई तीनकुने र समाजवादी मोर्चालाई भृकुटीमण्डपमा प्रदर्शन गर्न स्थान निर्धारण गरेको थियो। त्यसैक्रममा मेडिकल व्यवसायी दुर्गा प्रसाईँ नेतृत्वको राजावादी समुह सुरुदेखि नै निषेधित क्षेत्र उल्लङ्घन गर्दै नयाँ बानेश्वरतर्फ अघि बढ्ने प्रयासमा थियो।

प्रसाईँले आफैँले गाडी चलाएर निषेधित क्षेत्र तोडे। त्यसपछि बिग्रिएको अवस्था थप तनावग्रस्त बन्न पुगेको थियो। प्रदर्शनकारीहरू भौतिक संरचना तोडफोड, आगजनी र लुटपाटमा लागेका थिए।