हेटौंडा– शुक्रबार विहान बसको ठक्करबा भ्यान चालकको मृत्यु भएपछि आक्रोशित स्थानीयवासीले मकवानपुरको मनहरी गाउँपालिकामा पूर्वपश्चिम राजमार्ग अवरुद्ध गरेका छन्।

चितवनबाट हेटौंडातर्फ जाँदै गरेको बा प्र ०३००६ ख ५६८१ नम्बरको बस र मनहरीबाट लोथर बजारतर्फ गइरहेको बा प्र०३००१ च ३०१२ को म्याजिक भ्यान मनहरी गाउँपालिका–६ लोथरमा दुर्घटनामा परेका हुन।

दुई सवारी ठोक्किँदा भ्यान चालक राक्सिराङ गाउँपालिका–४ का ३२ वर्षीय सन्देश कोइरालाको मृत्यु भएको थियो। घाइते भएका कोइरालालाई उपचारका निम्ति चितवनतर्फ लैजाने क्रममा बाटोमै मृत्यु भएको हो। इलाका प्रहरी कार्यालय मनहरीको अनुसार भ्यानमा चालक कोइराला मात्र थिए।

दुर्घटनापछि मृतकका आफन्त र स्थानीयवासीले प्रदर्शन गरिरहेका छन्। आन्दोलनकारीले सडकमा अवरोध सिर्जना गरी घटनाको छानबिन गर्नुपर्ने र क्षतिपूर्तिको विषय तत्काल टुंगो लगाउनुपर्ने माग राखेका छन्। प्रहरी र प्रशासनले सडक खुलाउन प्रयास गरिरहेका छन्।