काठमाडौँ– दाङको घोराहीस्थित एक तरकारी फर्मबाट सामान चोरी गरेको आरोप लगाउँदै एक किशोरीलाई विजुलीको खम्वामा बाँधेर निर्घात कुटपिट गरिएको छ। घोराही उपमहानगरपालिका–१० की २६ वर्षीया शिला चौधरीमाथि यसरी कुटपिट गरिएको हो।

रातको समयमा घोराही–११ स्थित बिजुलीको खम्बामा बाँधेर उनलाई निर्घात कुटपिट गरिरहेको भिडियो अहिले सामाजिक सञ्जालमा भाईरल भईरहेको छ। कुटपिटको भिडिओ कुट्नेहरू आफैंले सामाजिक सञ्जालमा राखेका थिए।

उनलाई घोराही–११ चागुका गोपाल चौधरीकी श्रीमती र स्थानीय केही अन्य महिलाले बाँधेर निर्घात कुटपिट गरेको पाईएको छ। स्थानीयका अनुसार तरकारी फर्मका केही सामान हराएको र त्यो सामान शिलाले नै लगेको आरोप छ। उनी सोही फर्मकी कामदार हुन। कुटपिटका कारण घाँटी, टाउको र शरीरको भित्री भागमा दुखाई रहेको पीडितले जनाएकी छन।

यो घट्नालाई राजनीतिक दलका स्थानीय नेताले पैसाको लेनदेन गरेर लुकाउने प्रयास गरेका थिए। पीडितलाई ७० हजार रूपैयाँ दिएर घट्ना मिलाईएको थियो। तर, भीडीओ सार्वजनिक भएपछि पीडितकी आमाले प्रहरीमा जाहेरी दिएकी छिन्।

छोरीमाथि भएको अत्याचारबारे आवाज उठाउँदै उनले घटना मिलाउन दिइएको पैसा समेत फिर्ता गरेकी छिन्। उनले बिहीबार जिल्ला प्रहरी कार्यालय घोराहीमा जाहेरी दिएकी छिन्। डिएसपी चक्रबहादुर शाहका अनुसार यो घट्नालाई सामान्य कुटाकुट भनेर जानकारी गराईएको थियो।

उजुरीपछि प्रहरीले कुटपिट घटनामा संलग्न तीन जनालाई पक्राउ गरेको छ। घट्नाको अनुशन्धान भईरहेको उनले वताए।