कुलमान समर्थित राप्रपाको प्रदर्शनमा छिरेर पूर्वराजाको माग गर्ने अमेरिकी नागरिक पक्राउ
शीर्ष खबर 
काठमाडौँ– कुलमान घिसिङको समर्थनमा राष्ट्रिय प्रजातन्त्र पार्टी (राप्रपा) ले बिहीबार काठमाडौंको माइतीघरमा गरेको प्रदर्शनमा पसेर पूर्वराजा ज्ञानेन्द्रको पूनर्ववहाली माग गर्ने एक जना अमेरिकी नागरिक पक्राउ परेका छन्।
ढाकाको दौरा सुरूवाल र ढाका ढोपी लगाएर प्रदर्शनमा निस्किएका अमेरिकी नागरिक ५८ वर्षीय जुलियन क्रिपा ब्लिसलाई प्रहरीले पक्राउ गरेको हो। सरकारले नेपाल विद्युत प्राधिकरणको कार्यकारी निर्देशकबाट कुलमान घिसिङलाई हटाएको विरोधमा राप्रपाका केही नेताहरूले प्रदर्शन गरेका हुन्।
राप्रपाका खुस्बु ओली लगायतका नेताहरू सहभागी भएको प्रदर्शनमा जुलियन पनि सहभागि भएका थिए। उनले कुलमानको समर्थन गरेको प्लेकार्ड पनि बोकेका थिए। प्रदर्शनकै क्रममा प्रहरीले उनलाई नियन्त्रणमा लिएको छ।
जिल्ला प्रहरी परिसर काठमाडौंका एसपी अपिलराज बोहराका अनुसार उनी पर्यटक भिसामा नेपाल आएका हुन। गत जनवरी १८ मा आएका उनको सुरूमा १५ दिनको भिसा प्राप्त भएको देखिन्छ। फेब्रुअरी ३ मा उनको भिसा अवधि सकिएको थियो।
उनले पुनः फेब्रुअरी १९ देखि मार्च २४ सम्म ३४ दिनको भिसा अवधि थप गरेको फेला परेको हो। उनको भिसा अवधि सकिएकाले अध्यागमन विभाग पठाइने एसपी बोहराले बताए।
