विवाहको आश्वासन दिएर शारीरिक सम्वन्ध राखेपछि धोका दिने प्रहरी जवानविरुद्ध बलात्कारको उजुरी
शीर्ष खबर 
विराटनगर– विवाहको आश्वासन दिएर १९ वर्षीया एक किशोरीसँग शारीरिक सम्वन्ध राखेपछि धोका दिएका एक प्रहरी जवानविरुद्ध प्रहरीमा उजुरी परेको छ।
कोशी प्रदेश प्रहरी गणमा कार्यरत साह थरका जवानविरुद्ध विराटनगर महानगरपालिका–१५ घर भएकी किशोरीले झापाको इलाका प्रहरी कार्यालय बिर्तामोडमा उजुरी दिएकी हुन।
किशोरीका अनुसार २०७८ साल जेठदेखि उनीहरुको फेसबुकमार्फत चिनजान भएको थियो। साहले किशोरीसँग पटक–पटक भेट गर्न खोजेका थिए। गत ७ भदौमा साहले किशोरीलाई झापाको सुरुङ्गा क्षेत्रमा भेट्न बोलाएका थिए। रात परिसकेको भन्दै उनलाई होटल क्विन प्यालेसमा बस्न दबाब दिए।
होटलबाट घर फर्किन खोज्दा साहले ‘तिमीलाई एक्लै छोड्दिन, केही हुँदैन’ भन्दै रोक्न खोजे। पछि, कोठामा छिरेलगत्तै जबरजस्ती अँगालो हालेर बलात्कार गरेको पीडितको आरोप छ।
पछि उनले विवाह गर्न अस्वीकार गरेपछि पीडित किशोरीले धेरै पटक आत्महत्याको प्रयास गरेको खुलेको छ। केही दिनअघि पत्रकारहरूसँगको कुराकानीमा पनि उनले साहले केही समयसम्म बिहेको आश्वासन दिएर ढाटेको बताएकी थिइन।
इलाका प्रहरी कार्यालय बिर्तामोडका इन्स्पेक्टर प्रकाश विष्टले पीडितको जाहेरी दर्ता भइसकेको जानकारी दिए।
