काठमाडौँ– वहिनीलाई जिस्क्याएको रिसमा ललितपुरको इमाडोलमा एक ब्यक्तिले रामेछाप घर भई ओचुहाइट बस्ने ३० वर्षीय रिपक खातीको हत्या गरेका छन्। खातीको वुधबार राति महालक्ष्मी नगरपालिका–४ ओचु हाइटमा रहेको मन्दिर अगाडि खुकुरी प्रहार गरी हत्या भएको हो।

प्रहरीले हत्या आरोपमा रामेछापकै २५ वर्षीय सुमन रसाइलीलाई पक्राउ गरेको छ। रिपक र सुमन चिनजानै ब्यक्ति रहेको जिल्ला प्रहरी परिसर ललितपुरका एसएसपी श्यामकृष्ण अधिकारीले जानकारी दिए।

प्रारम्भिक अनुशन्धानमा रिपककले सुमनकी करिव १५ वर्षीया वहिनीलाई जिस्क्याएको विषयमा घट्ना भएको देखिएको छ। बहिनीलाई जिस्क्याएको विषयमा सुमनले यसअघि पनि रिपकलाई सम्झाएका थिए। तर, रिपकको ब्यवहारमा परिवर्तन नआएपछि उनको हत्या भएको खुलेको छ।

रिपकले आफूलाई फेरि जिस्क्याएको भन्दै वहिनीले बुधबार पनि सुमनलाई सुनाएकी थिईन। त्यसपछि सुमनले उनलाई राति नै मन्दिरमा बोलाएका थिए। चिनजानकै भएकाले रिपक पनि मन्दिरमा पुगे। मन्दिरमा पुग्नासाथ राति करिव ११ बजे उनीमाथि खुकुरी प्रहार भएको पाईएको छ।