दमक– डेढ वर्षअघिको मोटरसाईकल दुर्घटनामा परी घाईते भएका झापाको भद्रपुर नगरपालिका–१० का २९ वर्षीय सरोज बस्नेतको बुधबार मृत्यु भएको छ।

दुर्घटनापछि विभिन्न अस्पतालमा उपचार गराई हाल घरमै रहेका बस्नेतको मृत्यु भएको प्रहरीले जनाएको छ। उपचारले पनि स्वास्थ्यमा सुधार नआएपछि उनको अचेत अवस्थामा नै मृत्यु भएको जनाईएको छ।

जिल्ला प्रहरी कार्यालय झापाका अनुसार २०८० भदौ १३ गते मध्यरातमा पूर्व–पश्चिम राजमार्गअन्तर्गत बिर्तामोड नगरपालिका–३ सञ्जीवनी अस्पतालअगाडि प्र १–०१–०१३ प ५१४० र मे ५ प ५५६८ नम्बरको मोटरसाइकल ठोक्किएर दुर्घटना भएको थियो।

दुर्घटनामा ५५६८ नम्बरको मोटरसाइकलका चालक कनकाई नगरपालिका–५ का २६ वर्षीय सागर घिमिरेको त्यतिबेलै मृत्यु भएको थियो। गम्भीर घाइते भएका घिमिरेलाई उपचारका लागि बिर्तामोडको बीएन्डसी अस्पताल पु¥याएपछि चिकित्सकले मृत घोषणा गरेका थिए।

५१४० नम्बरको मोटरसाइकलका चालक बस्नेतको १९ महिनापछि मृत्यु भएको हो।