मन्दिर दर्शन गरेर फर्किँदै गरेका यात्रु बोकेको बस दुर्घटना हुँदा ४ जनाको मृत्यु
शीर्ष खबर 
काठमाडौँ– अर्घाखाँचीको शितगंगा नगरपालिका–२ भुवनपाटामा बुधबार साँझ बस दुर्घटना हुँदा ४ जनाको मुत्यु भएको छ। ती मध्ये तीन जनाको सनाखत भएको छ।
प्रहरीका अनुसार दुर्घटनामा रुपन्देहीको बुटवल उपमहाननगरपालिका–८ का ५५ वर्षीया जमुना बस्याल, पश्चिम नवलपरासीको भुमहीकी ४५ वर्षीया उमा न्यौपाने, उनकी ६५ वर्षीया सासु (नामथर नखुलेकी) र पश्चिम बर्दघाटका ४५ वर्षीय बस चालक मदनकुमार विकको मृत्यु भएको हो।
जिल्ला प्रहरी कार्यालयका इन्स्पेक्टर विष्णुप्रसाद पौडेलका अनुसार बस चालक विकको उद्धार गरी अस्पताल लैजाने क्रममा बाटोमा मृत्यु भएको हो। दुर्घटनामा २७ जना घाइते भएका छन्। गम्भिर घाइते ६ जनालाई उपचारका लागि लुम्बिनी प्रादेशिक अस्पताल बुटवलमा पठाइएको छ ।
नवलपरासी बर्दघाट नगरपालिका–१२ का ३६ वर्षीय सन्तोष कँडेल, ४ वर्षीय अमर कँडेल, ३१ वर्षीय आशीष अधिकारी, २७ वर्षीया लक्ष्मी अधिकारी, ४ वर्षीया आन्दा अधिकारी, १४ वर्षीय आयान्स अधिकारीको अवस्था गम्भिर छ। अरुको प्राथमिक स्वास्थ्य केन्द्र ठाडामा उपचार भइरहेको छ।
गोरुसिङ्गे–सन्धिखर्क सडकखण्डमा रहेको सुपा देउराली मन्दिर दर्शन गरी नवलपरासी फर्कदै गरेको लु २ ख ३०३ नम्बरको बस दुर्घटनामा परेको हो। ओरालो सडकमा बस अचानक अनियन्त्रित भई सडकबाट करिब २५ मिटर तल खसेर दुर्घटना भएको प्रहरीले जनाएको छ।
