दाजु विदेश गएको मौका पारी खुकुरी प्रहार गरेर भाउजुको हत्या
शीर्ष खबर 
काठमाडौँ– मकवानपुरको हेटौंडामा एक युवकले खुकुरी प्रहार गरी ३५ वर्षीया भाउजुको हत्या गरेका छन्।
बुधबार राति ९ बजे हेटौंडा उपमहानगरपालिका–१ चौकीटोल घर भएका २३ वर्षीय रमेश दास (राहुल) ले जेठी भाउजु गुडियाको हत्या गरेका हुन। गुडियाको शव घरको दोस्रो तलामा भेटिएको थियो।
डीएसपी श्यामु अर्यालका अनुसार साढे २ तले घरको दोस्रो तलामा कोठाभित्र टाउको चोट लागेको अवस्थामा गुडिया मृत अवस्थामा फेला परेकी थिईन। प्रहरीले राहुललाई हातमा खुकुरी बोकेकै अवस्थामा पक्राउ गरेको छ।
राहुलले आफ्नो माइलो दाजु २८ वर्षीय रुपेशलाई पनि खुकुरी प्रहार गरी गम्भीर घाइते बनाएका छन्। रूपेशको टाउको, दाहिने हात, करङको भागमा चोट लागेको छ। उनको मकवानपुर सहकारी अस्पतालमा उपचार भइरहेको प्रहरीले जनाएको छ।
रूपेश घाइते भएको खबर पाएर दासको घर पुगेको प्रहरीले माथिल्लो तलाम महिला मृत अवस्थामा रहेको थाहा पाएको थियो। प्रहरीका अनुसार मृतक गुडियाका श्रीमान् रोशन ५ महिनादेखि कतारमा छन्। उनीहरुका तीन सन्तान छन्।
दास परिवारले हेटौंडामा फलफूलको व्यवसाय गर्दै आएको थियो। घटना घरायसी विवादका कारण भएको आशंका गरिएको छ। तर, स्पष्ट कारण खुलेको छैन।
