इटहरी– सुनसरीको इटहरी चोकमा रहेको सेन्ट्रल प्लाजामा लागेको आगो ६ घण्टा निरन्तरको प्रयासपछि नियन्त्रणमा आएको छ। आगलागीको क्रममा ५ जना सुरक्षाकर्मीसहित ७ जना घाइते भएका छन्।

सेन्ट्रल प्लाजामा फसेका सर्वसाधारणको उद्धार गर्ने र आगो निभाउने क्रममा उनीहरु घाइते भएको सुनसरी प्रहरीले जनाएको छ। घाइते सबैको उपचार भइरहेको छ।

बिहान साढे ९ बजे सुरू भएको आगो निभाउन १२ वटा दमकल, क्रेन, पानी र आयल निगमका फोम तथा फायरबलको प्रयोग गरिएको थियो। १० तले अग्लो भवनमा बारुणयन्त्रबाट पानी फाल्न कठिनाइ भएपछि विराटनगरबाट क्रेन झिकाएर सुरक्षाकर्मीहरूले आगो नियन्त्रणमा लिएका थिए।

यसैगरी, नेपाल प्रहरी, सशस्त्र प्रहरी बल र नेपाली सेनाका गरी ३२२ जनाको टोली खटिएको थियो। यस्तै, होटलमा फसेकाहरूको उद्धारको लागि कोशी सरकारले काठमाडौंबाट नेपाली सेनाको हेलिकप्टर मगाएको थियो। सशस्त्र प्रहरीको टोलीले आगलागीमा फसेका ८ पुरुष र ३ जना महिला गरी ११ जनालाई उद्धार गरेको थियो। जसमा एकजना बंगलादेशी नागरिक छन्।

पाँचौ तलाबाट सुरू भएको आगो छैटौं र सातौं तलामा पनि सल्किएको थियो। आगोले तीन वटा तलामा क्षती गरेको प्रहरीले जनाएको छ। प्लाजामा होटेल, सिनेमा हल, बैंक, सुपर मार्केट, कपडाका पसल, मोबाइल तथा इलेकट्रोनिक्स पसलहरू सञ्चालनमा थिए। छैटौं तलामा रहेको बरण्डा रेष्टुराँ, किचन र पाँचौं तलामा रहेको कार्यालय कक्ष पूर्ण जलेको छ।

आगलागीबाट करोडौं रुपैयाँको क्षति भएको छ। आगलागीको कारण भने खुल्न नसकेको र क्षतिको विवरण संकलन भइरहेको इलाका प्रहरी कार्यालय इटहरीका डीएसपी लक्ष्मी भण्डारीले जानकारी दिए।