बुबा कतार गएको २ दिन नवित्दै कस्ले र किन गर्यो १३ बर्षीया गुलशना खातुनको हत्या ?
शीर्ष खबर 
लहान– सिरहाको गोलबजार नगरपालिका–९ गोविन्दपुरस्थित घुर्मी खोलाको किनारमा मंगलबार बोरामा भेटिएको शव स्थानीय १३ वर्षीया गुलशना खातुनकै भएको पुष्टि भएको छ। उनी १३ दिन अघिदेखि बेपत्ता थिईन।
२९ फागुनमा आमासँगै घाँस काट्न खेतमा पुगेकी गुलशना घर जान्छु भन्दै फर्किएकी थिइन्। पछि आफू फर्किँदा घरमा छोरी नदेखेपछि उनकी आमा जाहेदा खातुनले छरछिमेकमा सोधीखोजी गरिन्। तर, कसैले पनि उनको बारेमा बताउन सकेन।
४ कक्षामा पढ्दै गरेकी नाबालिका छोरी साँझसम्म घर नआएपछि जाहेदा इलाका प्रहरी कार्यालय मिर्चैया पुगिन। खोजतलासका लागि निवेदन दिएर फर्किईन। सोही निवेदनका आधारमा मिर्चैया प्रहरीले गोविन्दपुर लगायत उनी जान सक्ने सवै ठाउँमा फोटो देखाउँदै धुइँधुइँती खोजी ग¥यो। तर, प्रहरीले खोजतलास गर्दा उनको बारेमा कुनै सूचना हात लागेको थिएन।
मंगलबार एकाएक खोला किनारामा बोराभित्र गुलशनाको शव फेला प¥यो। प्रहरीले बोरा हेर्दा शव देखेपछि गुलशनाकी आमालाई बोलाएर सनाखत गराइयो। शव सडेगलेको अवस्थामा फेला परेको थियो। प्रहरीले शव पोस्टमार्टमका लागि सुनसरीको धरानस्थित बीपी कोईराला स्वास्थ्य विज्ञान प्रतिष्ठान पठाएको छ।
गुलशनाको हत्या भएको पुष्टि भएपनि हत्या कसले र किन ग¥यो भन्ने विषय पेचिलो बनेको छ। मधेश प्रदेश प्रहरी कार्यालयबाट प्राविधिक टोली बोलाएर अनुशन्धान सुरु गरिएको छ। प्रहरीले शव फेला परेको स्थाननजिकै रहेको टेलिकमको टावरसँग जोडिएका मोबाइल नम्बरहरू ‘ट्रेस’ गरिरहेको छ।
इलाका प्रहरी कार्यालय मिर्चैयाका डीएसपी पञ्चकुमार बाखुका अनुसार गुलशनाकै परिवारको मोबाइलको कल डिटेल समेत प्रहरीको निगरानीमा छन्। केही आशंकित व्यक्ति पनि निगरानीमा छन्।
अहिले २ वटा कोणबाट अनुसन्धान भईरहेको बाखुले जानकारी दिए। ‘पहिलो– कसैले गरेको गलत हर्कतलाई गुलशनाले देखेपछि प्रमाण नष्ट गर्न हत्या गरेको हुन सक्छ’ उनले भने–‘अर्को भनेको, बलात्कारपछि प्रमाण लुकाउन हत्या गरेको पनि हुनसक्छ।’
प्रहरीका अनुसार गुलशनाका बाबु बेचन दुई दिनअघि मात्रै वैदेशिक रोजगारीका लागि कतार गएका थिए।
