इटहरीको सेन्टर प्लाजामा भयंकर आगलागी, हेलिकप्टरको सहयोगमा ११ जनाको उद्धार
शीर्ष खबर 
इटहरी– सुनसरीको इटहरी उपमहानगरपालिका– ६ स्थित १० तले भवनमा रहेको सेन्टर प्लाजामा भंयंकर आगलागी भएको छ।
होटल बरन्डाबाट बिहान साढे ९ बजेदेखि आगलागी सुरु भएको जनाईएको छ। आगलागीको कारण खुल्न सकेको छैन।
भवनमा फसेका ८ पुरुष र ३ महिला गरी जम्मा ११ जनाको उद्धार गरिएको छ। उद्धार गरिएका तीन जनालाई उपचारका लागि इटहरी अस्पताल पठाइएको छ। आगो नियन्त्रणका लागि सशस्त्र प्रहरी, नेपाल प्रहरी र नेपाली सेनाका साथै स्थानीयसमेत खटिएका छन्।
सशस्त्र प्रहरीको नं. १ बराह बाहिनीबाट एसएसपी मनिष थापाको कमाण्डमा १०५ जना, नेपाली सेना र प्रहरीका साथै इटहरी, दुहबी, रामधुनी, धरान, बेलबारी, इनरुवा, वराहक्षेत्र, विराटनगर लगायतका १२ वटा दमकल परिचालन गरिएको थियो।
क्षतिको विस्तृत विवरण सङ्कलन भइरहेको जिल्ला प्रहरी कार्यालय सुनसरीले जनाएको छ। आगलागीबाट कति आर्थिक तथा भौतिक क्षति भयो भन्नेबारे अनुसन्धान जारी छ।
