जनकपुर– धनुषाको जनकपुर टुडे मिडिया ग्रुप प्रालि तथा कम्पनीका अध्यक्ष वृजकुमार यादवसहित ३ जनाबिरुद्ध भ्रष्टाचारको मुद्दा दर्ता भएको छ। अख्तियार दुरुपयोग अनुशन्धान आयोगले करिव साढे ६ लाख रुपैयाँ मिलेमतोमा भ्रष्टाचार भएको दावी गर्दै मंगलबार विशेष अदालतमा मुद्दा दायर गरेको हो।

यादवले बटेश्वर गाउँपालिकाका तत्कालीन प्रमुख प्रशासकीय अधिकृत सावनकुमार चौधरी र लेखा हेर्ने छैठौ तहका अधिकृत सुमनकुमार पुरीसँगको मिलोमतोमा उक्त रकम भ्रष्टाचार गरेको अख्तियारको दावी छ। उनले बोलपत्र आव्हानको सूचना र बोलपत्र स्वीकृतको सूचना छपाई गर्ने जिम्मा लिई सार्वजनिक प्रकाशन नगरी बटेश्वर गाउँपालिकाको ठेक्काको अभिलेखमा राख्ने गरी एक प्रतिमात्रै पत्रिका छपाएको अख्तियारको ठहर छ।

‘जनकपुर टुडे राष्ट्रिय दैनिक पत्रिकाको एक प्रति मात्र बोलपत्र आह्वान र बोलपत्र स्वीकृतको सूचना बटेश्वर गाउँपालिकामा पेश गरी/गराई सोही झुट्टा विवरणसहितको पत्रिकाको आधारमा रू.६,४४,१०० भुक्तानी लिएको पुष्टि भएको हुँदा निजलाई भ्रष्टाचार निवारण ऐन, २०५९ को दफा ८ को उपदफा (१) को देहाय (ङ) बमोजिमको कसुरजन्य कार्यको नगद तथा गैरकानूनी लाभ प्राप्त गर्ने प्रकृतिको मतियार भई सोही ऐनको दफा २२ बमोजिमको कसुरमा मुख्य कसूरदारहरूलाई भ्रष्टाचार निवारण ऐन, २०५९ को दफा ८ को उपदफा (१) बमोजिम हुने सजायलाई आधार मानी सोही ऐनको दफा २२ को प्रतिवन्धात्मक वाक्यांश बमोजिम मुख्य कसुरदार सरह सजाय गरी बिगो असुल उपर हुन मागदाबी लिई आज बिशेष अदालत, काठमाडौँमा आरोपपत्र दायर गरिएको छ।’– अख्तियारले जारी गरेको विज्ञप्तिमा भनिएको छ।

विज्ञप्ति अनुसार बटेश्वर गाउँपालिका अन्तर्गतका वडाहरूमा स्वास्थ्य चौकी भवन र डिप बोरिङ तथा डिप बोरिङ हाउस निर्माण कार्यमा अनियमितता गरेको उजुरी परेको थियो। छानविनका क्रममा तत्कालीन प्रमुख प्रशासकीय अधिकृत चौधरी र लेखा हेर्ने छैठौ तहका अधिकृत पुरीले बोलपत्र आव्हानको सूचना र बोलपत्र स्वीकृतको सूचना सार्वजनिक खरिद ऐन बमोजिम राष्ट्रिय स्तरको दैनिक पत्रिकामा प्रकाशन गर्न जनकपुर टुडे राष्ट्रिय दैनिकका प्रधान सम्पादक एवं जनकपुर टुडे मिडिया ग्रुप प्रालिका अध्यक्ष यादवलाई दिएका थिए।

तर, उनीहरुको मिलोमतोमा उक्त बोलपत्र आव्हानको सूचना र बोलपत्र स्वीकृतको सूचना लुकाई छिपाई, सार्वजनिक रूपमा सूचना प्रकाशन नगरी बटेश्वर गाउँपालिकाको ठेक्काको कार्यालयमा अभिलेख राख्ने प्रयोजका लागि जनकपुर टुडे राष्ट्रिय दैनिक पत्रिकामा मिति २०७६ माघ २४ मा एक प्रतिमात्र बोलपत्र आह्वान र मिति २०७६ चैत ३ मा एक प्रतिमात्र बोलपत्र स्वीकृतको सूचना प्रकाशित गरीएको खुलेको छ।

सोही एक प्रति पत्रिका गाउँपालिकामा पेश गरी ६ लाख ४४ हजार १०० भुक्तानी दिएको पुष्टि भएको अख्तियारतको दावी छ। यो प्रकरणमा चौधरी र पुरीलाई भ्रष्टाचार निवारण ऐन, २०५९ को दफा ८ को उपदफा (१) को देहाय (ङ) बमोजिमको कसुरमा बिगो ६ लाख ४४ हजार एक सय कायम गरी सोही ऐनको दफा ८ को उपदफा (१) बमोजिम कैद र बिगो बमोजिमको जरिवाना सजाय माग गरिएको छ।