थप्पडको बदला लिन २० जनाको ग्याङ बनाएर युवकको हत्या, उदयपुरका ३ सहित १७ जना पक्राउ
शीर्ष खबर 
काठमाडौँ– राजधानीको कलंकीस्थित एलआरआई स्कुल नजिकै सोमबार साँझ एक समूहको आक्रमणमा परी चन्द्रागिरि नगरपालिका–१५ ढुंगेअड्डाका २२ वर्षीय अभय गोलेको मृत्यु भयो।
आक्रमणमा नागढुंगा बस्ने २३ वर्षीय सन्दिप भुजेल, हेटौँडा घर भई पुरानो नैकाप बस्ने पवन तामाङ ‘चक्रे’ र चन्द्रागिरी घर भएका २२ वर्षीय पासाङ शेर्पा घाइते भएका छन्। उनीहरूको सहिद मेमोरियल अस्पतालमा उपचार भइरहेको छ।
आक्रमणमा संलग्न भएको आरोपमा प्रहरीले १७ जनालाई पक्राउ गरेको छ। प्रहरीका अनुसार गत होलीको अघिल्लो दिन (२८ फागुन) मा अभय लामा र नैकाप घर भएका निश्चल मगरबीच विवाद भएको थियो। आरोप अनुसार अभयले निश्चललाई थप्पड हानेका थिए।
होली सकिएपछि सोही विषयमा निश्चल समुहका कलंकीस्थित खड्का गाउँ बस्ने २५ वर्षीय रोहित खड्काले अभयसँग विवाद गरेका थिए। यसैक्रममा रोहितको मोबाइल हरायो। उनले चन्द्रागिरी घर भएका २२ वर्षीय पासाङ शेर्पाले मोबाइल लगेको आरोप लगाए।
यसैक्रममा थप्पड हानेको र मोबाईल चोरी भएको विषय सल्टाउन निश्चल समुहले अर्को समूहलाई आफनो समुहमा मिलाउँछन्। त्यसपछि उनीहरुले सोमबार अभयसँग भेट्न खोज्छन्। अभय समुहले एलआरआईमा आउन चुनौती दिएपछि २० जनाको समुह बनाएर रोहित त्यहाँ पुगेको अनुशन्धानमा खुलेको छ।
जम्का भेट भएपछि रोहित र निश्चल समूहले रड प्रहार गरेर अभयको हत्या गरेको जिल्ला प्रहरी परिसर काठमाडौँका एसपी अपिल बोहराले जानकारी दिए। हत्यामा संलग्न निश्चल र विनय वाइबा सहित ४ जना फरार छन्।
उदयपुर घर भई स्युचाटार वस्ने १९ वर्षीय साङ्गे लामा, उदयपुरको गाईघाट–७ घर भई स्युचाटार बस्ने २१ वर्षीय खेमराज मगर, उदयपुर घर भई स्युचाटार बस्ने १९ वर्षीय सुसान श्रेष्ठ, काठमाडौँ–१४ खड्कागाउँका २५ वर्षीय रोहित खड्का, नवलपरासी घर भई स्युचाटार बस्ने २० वर्षीय झेडी मगर, काठमाडौँ–८ का २३ वर्षीय नवीन तामाङ, काठमाडौँ–१४ कलंकीका २७ वर्षीय राज अर्याल, चन्द्रागिरी–७, पुरानो नैकापका २६ वर्षीय जीवन श्रेष्ठ, तनहुँका १९ वर्षीय गौतम कुमार जोगी र प्रवेश गुरुङ पक्राउ परेका छन्।
यसैगरी, सर्लाहीको राजगढ–६ घर भई स्युचाटार बस्ने २१ वर्षीय निश्चल तामाङ, पर्सा घर भई स्युचाटार बस्ने २२ वर्षीय आशिष श्रेष्ठ, काठमाडौँ–९ का २५ वर्षीय अजित बुढाथोकी, धादिङ घर भई स्युचाटार बस्ने २० वर्षीय सुजन तामाङ, सिन्धुली घर भइ स्युचाटार बस्ने १९ वर्षीय डेनियल बिक, धादिङ घर भई स्युचाटार बस्ने २३ वर्षीय विनय आलेमगर र गोरखा घर भई स्युचाटार बस्ने २० वर्षीय रन्जित श्रेष्ठ पनि पक्राउ परेको प्रहरीले जनाएको छ।
