लहान– सिरहाको गोलबजारमा बोराभित्र शव फेला परेको छ। गोलबजार नगरपालिका–९ गोविन्दपुरस्थित घुर्मी खोलाको किनारमा शव फेला परेको हो।

प्रहरीले शव उठाउने प्रयास गरिरहको छ। इलाका प्रहरी कार्यालय, मिर्चैयाका डीएसपी पञ्चकुमार बाखुका अनुसार शव कसको हो भन्ने खुलेको छैन। शव कुहिएको अवस्थामा भेटिएकोले पहिचान गर्न अप्ठ्यारो भएको उनको भनाई छ।

तर, सोही गाउँकी १३ वर्षीया बालिका गुल्सना खातुन हराइ रहेकाले शव उनकै हो की ? भन्ने आशंका गरिएको छ। गाउँकै विद्यालयमा कक्षा ४ मा अध्ययनरत बालिका गत २९ फागुनको बिहान ९ बजे घरबाट निस्केकी थिइन्। त्यसपछि उनी घर नफर्किएको जनाईएको छ।

आमा जाहेदा खातुनले १ चैतमा खोजतलासका लागि प्रहरीमा निवेदन दिएकी थिइन्। बालिकाका पिता बेचन अलि छोरी हराउनु दुई दिन अघि मात्रै वैदेशिक रोजगारीका लागि कतार गएका छन्।