काठमाडौँ– खोटाङको केपिलासगढी गाउँपालिका–२ घर भई भक्तपुरको कमलपोखरी बस्दै आएका ६६ वर्षीय ओमप्रकाश राईको उनकै रक्सी पार्टनरले टाउकोमा ढुङ्गाले हानेर हत्या गरेको पुष्टि भएको छ।

राईको गत आइतबार मध्यपुर थिमि नगरपालिका–९ बोडे निलबाराहीस्थित पिकनिक स्थलनजिक पार्किङ स्थलमा शव फेला परेको थियो।

कवाडीका सामान संकलन गरेर जिविका चलाउँदै आएका राईको रोल्पाको परिवर्तन गाउँपालिका–६ घर भएका ५७ वर्षीय हिमाल बुढामगरले ढुङ्गाले टाउकोमा प्रहार गर्दा मृत्यु भएको प्रहरीले जनाएको छ।

बुढामगरले प्रहरीलाई दिएको बयान अनुसार उनिहरु दुबै मिलेर रक्सी सेवन गरेका थिए। त्यसपछि भेटी टिप्न भन्दै निलबाराही पिकनिकस्थल पुगेको घर फर्किने क्रममा भने १०० रुपैयाँको विवाद हुँदा हत्या भएको प्रहरीले बताएको छ।

घर फर्किने क्रममा राईले आफ्नो सय रुपैयाँ खोसेपछि झगडा भएको र आफूले ढुङ्गा प्रहार गरी हत्या गरेको बुढामगरले बयान दिएका छन्। प्रहरी घटनास्थल पुग्दा रगतले लतपतिएको अवस्थामा भुइँमा शव फेला पारेको थियो।

दाहिने कानको लोती चुडिएको, टाउकोमा ठूलो चोट र सँगै रगत लतपतिएको ढुंगा फेला परेको प्रहरीले जनाएको छ। शवसँगै फेला परेको बोरामा कवाडीका सामानहरु पनि थिए। बोरा नजिकै क्याप, झोला पनि थियो। पछि मृतकका छोराले शवको सनाखत गरेका थिए।

प्रहरीका अनुसार शनिबार मात्रै ओमप्रकाशको शव भेटिएको ठाउँ नजिकै लामाहरुले पूजापाठ गरेका थिए। पूजापाठको भेटी टिप्न उनीहरु शनिबार साँझ उक्त ठाउँमा पुगेको पाइएको छ। बुढामगरलाई पक्राउ गरिएको भक्तपुर प्रहरीका डीएसपी ढुण्डिराज नेउपानले बताए।