काठमाडौँ– कोईला बोकर काठमाडौँ जाँदै गरेको ट्रक मुग्लिन–नारायणगढ सडकखण्डको चितवनस्थित चौधकिलो भन्नेबाट त्रिशूलीमा खस्दा चालकको मृत्यु भएको छ। ट्रकका सहचालक घाइते छन्।

बिहान करिब साढे ६ बजे बागमती प्रदेश ०३–००१ ख ४८७४ नम्बरको ट्रक आफैं अनियन्त्रित भई त्रिशूलीमा खसेको थियो। दुर्घटनामा चालक रौतहट घर भएका करिव३५ वर्षीय रामनारायण यादवको मृत्यु भएको छ।

सहचालक रौतहटकै १९ वर्षीय असुन्द्रकुमार यादव घाइते भएका छन्। इलाका प्रहरी कार्यालय जुगेडीले चालक र सहचालक दुवैलाई उद्धार गरी भरतपुर अस्पताल पठाएको थियो। चालकको करिव साढे ८ बजे उपचारका क्रममा मृत्यु भएको प्रहरीले जनाएको छ।

सहचालक यादवलाई थप उपचारका लागि नयाँ मेडिकल कलेज भरतपुरमा रिफर गरिएको छ। दुर्घटनामा कारण ट्रक पूर्णरुपमा क्षति भएको र आधा भाग त्रिशूली नदीमा डुबेको प्रहरीको भनाई छ।