जनकपुर– आमा मरेको भोलिपल्ट छिमेकी महिलालाई बलात्कार गरेको आरोपमा पक्राउ परेका ब्यक्तिलाई हाजिरी जमानीमा छुटाएर लगेका सर्लाहीको हरिवन नगरपालिका–१, भोक्टेनीका इन्द्रदेव महतो पक्राउ परेका छन्।

प्रहरीले महतोलाई सोमबार पक्राउ गरेको हो। प्रहरीका अनुसार स्थानीय जिवछ महतो कोईरीले गत २१ फागुनको राति छिमेकी ४५ वर्षीय महिलालाई बलात्कार गरेका थिए। आफ्नै छिमेकीबाट बलात्कृत भएको भन्दै महिलाले भोलिपल्ट (२२ फागुन)मा इलाका प्रहरी कार्यालय, हरिवनमा लिखित उजुरी दिएकी थिइन्।

प्रहरीले सोही दिन अभियुक्त जिवछ महतोलाई पक्राउ गर्यो। तर घट्ना भएको भनिएको अघिल्लो दिन (२० फागुन) मा जिवछ महतोकी आमाको निधन भएको थियो। सोही कारण देखाउँदै हरिवन–४, सासापुरका इन्द्रदेव महतोले काज किरिया सम्पन्न भएपछि पुनः उपस्थित गराउने सर्तमा अभियुक्तलाई हाजिरी जमानीमा छुटाएका थिए।

तर, काज किरिया सकिएपछि जिवछ प्रहरीमा उपस्थित नभई फरार भए। जिवछ फरार भएपछि इन्द्रदेव पनि फरार भएका थिए। त्यसपछि, पीडित महिलाले ४ चैतमा जाहेरी दर्ता गराईन। उनले पीडक जिवछ फरार भएको र स्थानीय नेताहरुलाई लगाएर १५ लाखको वार्गेनिङ गरिरहेको आरोप लगाएकी छिन्।

पीडित परिवारले घटनाको न्यायिक छानबिन गरी मुख्य अभियुक्तलाई चाँडो पक्राउ गर्न गर कानुन अनुसार कारवाही गर्न माग गरेको छ।