धनुषाका शिवशंकरको हत्या प्रकरणमा जोडियो श्रीमती र भिनाजुको अवैद्य सम्वन्ध
शीर्ष खबर 
जनकपुर– धनुषाको क्षीरेश्वरनाथ नगरपालिका–८, दिगम्बरपुरका २५ वर्षीय शिवशंकर महतोको हत्या प्रकरण श्रीमती सिर्जना र उनका भिनाजु नाता पर्ने ब्यक्तिको अवैद्य सम्वन्ध (वेवाहेत्तर सम्वन्ध) तिर सोझिएको छ।
शिवशंकरको हत्या आरोपमा प्रहरीले शिवशंकरकी श्रीमती सिर्जनालाई पक्राउ गरेर अनुसन्धान गरिरहेको छ। प्रहरी स्रोतका भारतको मुम्बईमा बस्दै आएका शिवशंकर डेढ महिनाअघि मात्रै घर फर्किएका थिए। यस बीचमा सिर्जनाको उनकै भिनाजु नाता पर्ने व्यक्तिसँग ‘सम्बन्ध’ रहेको खुलेको छ।
मुम्बईबाट फर्किएका शिवशंकर केही दिनअघि महोत्तरीको पशुपतिनगर स्थित ससुराली जाँदा सिर्जनासँग भनाभन भएको थियो। तर, के विषयमा भनाभन भयो भन्ने खुलेको छैन। शिवशंकरका भाई राम महतोका अनुसार शिवशंकरमाथि कुटपिटसमेत भएको थियो।
त्यो घट्नालाई सिर्जनाले ‘आफुमाथि पतिले दुर्व्यवहार गरेको’ भन्दै आफ्नो भिनाजु नाता पर्ने प्रेमीलाई सुनाएकी थिईन। सिर्जनको कुरा सुनेपछि भिनाजुले ‘चिन्ता नगर, शिवशंकरबाट सधैंका लागि छुटकारा दिलाइदिन्छु’ भन्दै उनलाई ढुक्क पारेको प्रहरी अनुशन्धानबाट खुलेको छ।
यता, ससुरालीमा अपमानित भएको महसुस गरेर शिवशंकर घर फर्किएका थिए। त्यसको केही दिनपछि नै सिर्जनाले माइतमा हजुरबुबा मरेकाले जानुपर्छ भन्दै शिवशंकरलाई दबाब दिन थालेकी थिईन। उनको यही दबाबमा शिवशंकरको हत्याको योजना लुकेको हुनसक्ने प्रहरीको अनुमान छ।
सिर्जनाले धेरै जिद्दी गरेपछि गत बिहीबार शिवशंकर ससुराली जान तयार भए। उनी मोटरसाईकलमा सिर्जना र १० महिनाका छोरालाई लिएर धनुषास्थित महेन्द्रनगरसम्म पुगेको देखिएको छ। त्यहाँ उनीहरूलाई लिन सिर्जनाले माईतीतिरबाट बोलाएका दुईवटा मोटरसाइकल तयारी अवस्थामा थिए।
प्रहरीका अनुसार शिवशंकरलाई पहिला नै हत्या गर्ने योजना बनाएर त्यसरी मोटरसाइकल मगाईएको हुन सक्ने अनुमान छ। त्यहाँ रहेका मोटरसाईकल मध्ये एउटामा सिर्जना र छोरा चढे भने अर्कोमा शिवशंकर चढेकोसम्म प्रहरीले पत्ता लगाएको छ।
सिर्जनालाई छोरासहित माइतीमा छाडेपछि त्यही समूहले महोत्तरीको गौशाला नगरपालिका– ८ सागरनाथ वनमा पुर्याई शिवशंकरको हत्या गरेको हुन सक्ने आशंका प्रहरीको छ। खुकुरीले काटेर उनको हत्या गरेको अनुसन्धानबाट खुलेको छ।
एकाएक शुक्रबार साँझ ५ बजे सागरनाथस्थित रेल्वे ट्रयाकबाट सय मिटर पर शिवशंकरको शव क्षतविक्षत अवस्थामा भेटिएको थियो। नग्न अवस्थामा रहेको शव विभिन्न भागमा काटिएको थियो। चिन्न नसकियोस् भनेर जलाएको थियो।
तर, शनिवार विहान नै परिवारले उनको सनाखत गर्यो। लगत्तै प्रहरीले सिर्जनालाई पक्राउ गरेको छ। प्रहरीले शिवशंकर चढेको मोटरसाइकल र चालकको पहिचान गरिसकेको छ। हत्यामा संलग्न भनिएका अन्यको खोजी भइरहेको महोत्तरी प्रहरीका एसपी नकुल पोखरेलले जानकारी दिएका छन्।
यो पनि,
