विराटनगर– इलामको इलाममाई नगरपालिका– की १३ वर्षीया बालिका बलात्कृत भएकी छिन्। बलात्कारको आरोपमा प्रहरीले इलाममाई नगरपालिका–२ का २४ वर्षीय केशव गिरीलाई पक्राउ गरेको छ।

गिरीले गत ६ चैतको साँझ इलाम माई–२ सितलीस्थित चिया बगानमा लगी डर, त्रास र प्रलोभनमा पारेर बालिकालाई बलात्कार गरेको खुलेको छ। घट्ना सार्वजनिक भएपछि पैसा लेनदेन गरेर मिलाउने प्रयास भएको थियो।

तर, पीडित बालिकाकी आमाले ९ चैतमा जिल्ला प्रहरी कार्यालय इलाममा उजुरी दिएपछि घट्ना सार्वजनिक भएको हो। प्रहरीले बलात्कारमा संलग्न केशव, ३ लाख दिएर मिलापत्र गराउन खोज्ने उनका बुबा ५८ वर्षीय केदारनाथ गिरी, काका ४३ वर्षीय नारायण गिरी (यादव) र छिमेकी ३८ वर्षीय तुलाधर अर्याल (पाँचथरे) लाई पक्राउ गरेको छ।

केशव र नारायणलाई इलाम र झापाको सिमानाबाट लुकेर बसेको अवस्थामा तथा केदारनाथ र तुलाधरलाई घरैबाट नियन्त्रणमा लिइएको प्रहरीले जनाएको छ। उनीहरुलाई जिल्ला अदालत इलाममा उपस्थित गराई ७ दिनको म्याद लिएर अनुशन्धान भईरहेको प्रहरीले जनाएको छ।