काठमाडौँ– दाङको घोराही उपमहानगरपालिका–९, खैरास्थित सांग्रीला प्लाई तथा भेनियर उद्योगमा १० घण्टा अघिदेखि सुरु भएको आगलागी अझै जारी छ। ५ वटा दमकल र दर्जनौं पानीका ट्यांकरको सहयोगमा सुरक्षा निकायको अथक प्रयासले पनि आगो नियन्त्रणमा आउन सकेको छैन।

७ बिघा क्षेत्रफलमा फैलिएको र नेपालकै ठूलोमध्येको एक यो उद्योगले प्लाई उत्पादन गरी देशका विभिन्न जिल्लाहरू र भारतसमेत निर्यात गर्दै आएको थियो। राति करिब १ बजे उद्योगमा आगलागी भएको थियो।

जिल्ला प्रहरी कार्यालय दाङका डिएसपी चक्रबहादुर शाहका अनुसार करिब १० घण्टामा ५० प्रतिशतमात्रै आगो नियन्त्रणमा आएको बताए। उद्योगमा तीव्र ज्वलनशील काठहरू भएकाले नियन्त्रणमा लिन कठिन भएको उनको भनाई छ।

कपिलवस्तुको चन्द्रौटा नगरपालिकाका २ वटा, रुपन्देहीबाट एउटा, बाँकेबाट दुई वटा, बर्दियाबाट एउटा दमकल आएर आगलागी निभाउने प्रयास जारी छ। आगो निभाउन दर्जनौ ट्यांकरहरूसमेत परिचालन गरिएको छ। नेपाल प्रहरी, सशस्त्र प्रहरी, नेपाली सेना र स्थानीयहरू खटिएका छन्।

उद्योग आसपास रहेका दुई वटा घर र एउटा गोठमा सामान्य क्षति भएको छ। उद्योगमै राखिएका तीन वटा ट्रकहरू पनि जलेर नष्ट भएको छ। उद्योगबाट १०० मिटरको दुरीसम्म रहेका १५ वटा र दुई सय मिटरसम्म रहेका ३० वटा घरका सदस्यहरूलाई सम्भावित दुर्घटनाबाट जोगाउन राति नै खुला स्थानमा राखिएको छ।

उद्योग भित्र कुनै मजदुर वा कर्मचारी नबस्ने हुँदा मानवीय क्षति भने नभएको सीडीओ डिएसपी चक्रबहादुर शाहले बताए। यतिखेर आगो उद्योग भित्र मात्रै बलिरहेको हुँदा त्यो अझै केही बेरको प्रयास पछि मात्रै पूर्ण रुपमा निभाउन सम्भव हुने उनले बताए।

क्षतिको विवरण यकिन भइनसकेको र त्यो विवरण पछि मात्रै संकलन हुने अधिकारीहरूले बताएका छन्। आगोलागी कारण यकिन नभएपनि विद्युत सर्ट भएको हुनसक्ने प्रहरीको अनुमान छ।