जनकपुर– पर्साको वीरगञ्ज महानरपालिका–२५ का वडाध्यक्ष आशुतोष चतुर्वेदीमाथि कुटपिट भएको घटनामा प्रहरी, पत्रकार र वडाध्यक्षसहित सात जनाविरुद्ध पक्राउ पुर्जी जारी भएको छ ।

पर्सा प्रहरीका एसपी गौतम मिश्रका अनुसार पर्सा जिल्ला अदालतले आइतबार सात जनाविरुद्ध पक्राउ पुर्जी जारी गरेको हो।

नेपाल प्रहरीका वरिष्ठ सई सागर शमशेर जबरा, विपद व्यवस्थापन केन्द्रमा कार्यरत प्रहरी जवान दिपेश क्षेत्री, वीरगंज महानगरपालिका–१० का वडाध्यक्ष सुशील साह कानु, नेपाल पत्रकार महासंधका उपाध्यक्ष एवं कान्तिपुर मिडिया ग्रुपका पत्रकार भुषण यादव, माइस्थान पुल हाउसका सञ्चालक विक्की गुप्ता, नगवाका भुसाल चौरसिया र घडिअर्वाका लखन गुप्ताविरुद्ध पक्राउ पुर्जी जारी भएको हो।

पक्राउ पुर्जी जारी भएसँगै उनीहरूलाई पक्राउ गरेर अनुसन्धान गरिने प्रहरीले जनाएको छ। वडाध्यक्ष चतुर्वेदीले प्रहरी सहित ७ जनाले आफूमाथि आक्रमण गरेको भन्दै शुक्रबार प्रहरीमा जोहरी दर्ता गराएका थिए। सो जाहेरीका आधारमा आइतबार अदालतले पक्राउ पूर्जी जारी गरेको हो।

आरोपित ७ जनाले २९ फागुन (होली) को राति मदिरा सेवन गरी वीरगञ्ज महानगरपालिका–८ स्थित डाइमण्ड पार्टी प्यालेसमा वडाध्यक्ष चतुर्वेदीमाथि आक्रमण गरेका थिए। पार्टी प्यालेसका सञ्चालक वीरेन्द्र पासवानका छोराको बर्थ–डे पार्टीमा गएका वेला आफुमाथि आक्रमण भएको वडाध्यक्ष चर्तुवेदीले वताएका छन्।

घट्नाको सीसीटीभी फुटेज सामाजिक सञ्जालमै सार्वजनिक भएको थियो। फुटेजमा वडा अध्यक्ष चतुर्वेदीमाथि मरुणासन्न हुनेगरि कुटपिट गरेको देखिएको थियो।

यो पनि,

• प्रहरीका वरिष्ठ सईको नेतृत्वमा वीरगञ्ज– २५ का वडाध्यक्षमाथि वर्थडे पार्टीमै कुटपिट