काठमाडौँ– बाँकेको डुडुवा गाउँपालिका–२ बेतहनीमा पानी बोक्ने ट्यांकरले ठक्कर दिँदा दुई जना बालकको मृत्यु भएको छ।

दिउँसको करिव साढे ३ बजे भे१ख ४१०७ नम्बरको ट्यांकरको ठक्करबाट स्थानीय विशाल गोडिया र शिवकुमार गोडियाको घटनास्थलमै मृत्यु भएको हो। करिव ९/१० वर्षका उनीहरु सहोदर दाजुभाइ हुन।

स्कुलबाट फर्किदै गर्दा बेतहनी चोकमा ट्यांकरले उनीहरूलाई ठक्कर दिएको थियो। दुवै बालक बेतहनीको नौरीगढी एकेडेमीमा एलकेजीमा अध्ययनरत थिए। ठक्करबाट लडेका उनीहरू चिच्याउँँदै गर्दा ट्यांकरले किचेको प्रत्यक्षदर्शीले जानकारी दिए।

घटनापछि स्थानीय बासिन्दाले ट्यांकरमा आगजनी गरेका छन्। घट्नास्थलमा प्रहरी र स्थानीय बासिन्दाबीच झडप भएको छ। स्थानीयले प्रहरी चौकीमासमेत आगजनी गरेपछि अवस्था तनावग्रस्त छ।

जिल्ला प्रहरी कार्यालय बाँकेका डीएसपी दीपक पातलीले दुई बालकको शव घटनास्थलमै राखेर प्रदर्शन भइरहेको बताए।