काठमाडौँ– भक्तपुरको मध्यपुर थिमि नगरपालिका–९ बोडे निलबाराहीस्थित पिकनिक स्थलनजिक खोटाङका एक ब्यक्तिको हत्या भएको छ।

केपिलासगढी गाउँपालिका–२ घर भएका ६० वर्षीय ओम प्रकाश राईको हत्या भएको हो। आईतबार विहान करिव ६ बजे उनको शव फेला परेको हो। काठमाडौँमै पठाओ चलाउने छोराले मृतकको सनाखत गरेका छन्। राईले कवाडीको सामान संकलन गर्ने काम गर्ने गरेको खुलेको छ।

राईको हत्या शनिबार राति भएको प्रहरीको आशंका छ। प्रहरीले राईसँगै कवाडीका समान संकलन गर्ने अन्य दुई जना हत्यामा संलग्न हुन सक्ने आशंका गरेको छ। शनिबार घट्नास्थल नजिकै लामाहरुले पूजापाठ गरेका थिए। सोही पूजापाठको भेटी टिप्न शनिबार साँझ त्यहाँ पुगेका उनीहरुको विवादका क्रममा हत्या भएको हुनसक्ने अनुमान छ।

अनुशन्धानमा देखिए अनुसार मृतक राई यसअघि पनि उक्त ठाउँमा भेटी टिप्न जाने गरेका थिए। शनिबार पनि पूजापाठ भएकाले भेटी टिप्नकै लागि उनी त्यहाँ पुगेको हुनसक्ने प्रहरीको अनुमान छ। घट्नास्थलमा रगत लतपतिएको, दाहिने कानको लोती चुडिएको, टाउकोमा ठूलो चोट लागेको अवस्थामा शव भेटिएको थियो।

शव नजिकै रगत लतपतिएको ढुंगासमेत फेला परेको छ। शवसँगै बोरा र त्यसभित्र कवाडीका सामानहरु पनि भेटिएका छन्। बोरा नजिकै क्याप र झोला पनि रहेको प्रहरीले जनाएको छ।