जनकपुर– धनुषाको क्षिरेश्वरनाथ नगरपालिका–८ दिगम्बरपुरका २५ वर्षीय शिवशंकर महतोको विभत्स हत्या भएको छ।

शरीरका ठाउँठाउँमा खुकुरीले काटेको र मुखमा आगो लगाईएको अवस्थामा उनको शव महोत्तरीको गौशाला नगरपालिका ८ स्थित सागरनाथ वनमा फेला परेको छ। शिवशंकरको शव नग्न अवस्थामा फेला परेको प्रहरीले जनाएको छ।

प्रहरीका अनुसार सागरनाथ वनको रेल्वे ट्रयाकबाट करिब एक सय मिटर दक्षिणतर्फ शुक्रबार साँझ करिव साढे ५ बजे शव फेला परेको हो। सनाखत भने शनिबार मात्र भएको महोत्तरी प्रहरीले जनाएको छ।

जानकारी अनुसार शिवशंकर बिहीबार दिउँसो महोत्तरीको बर्दिबास नगरपालिका–५ पशुपतिनगर स्थित ससुराली जान भनेर हिडका थिए। श्रीमती सृजना र १० महिने छोरासहित एउटै मोटरसाईकलमा हिडेका उनी महेन्द्रनगरसम्म सँगै थिए।

त्यहाँ पुगेपछि श्रीमती सृजनाले माइतबाट बोलाएका दुई मध्ये एउटा मोटरसाइकलमा शिवशंकर र अर्को मोटरसाईकलमा छोरासहित सृजना चढेकी थिइन्। घरपरिवार शिवशंकर ससुरालीमा रहेकोमा ढुक्क थिए।

तर, शुक्रबार महोत्तरी प्रहरीले शव पहिचानका लागि बोलाएपछि उनीहरु छाँगाबाट खसे झै भए। भाइ राम महतोका अनुसार शिवशंकरको ससुराली पुग्नु अघि नै हत्या भएको पाईएको छ। उनका अनुसार केही दिन अघि शिवशंकरमाथि ससुरालीमै कुटपिटसमेत भएको खुलेको छ।

त्यसपछि शिवशंकर ससुराली जान मानेका थिएनन्। उनलाई सृजनाले हजुरबुबाको मृत्यु भएको कहानी सुनाएर ससुराली जान बाध्य बनाएको खुलेको छ।

महोत्तरी प्रहरीले घट्नाको अनुशन्धान भईरहेको जनाएको छ।