काठमाडौँ– कैलालीको धनगढीमा ग्यास सिलिन्डर पड्किएर घाईते भएकी एक महिलाको मृत्यु भएको छ।

धनगढी उपमहानगरपलिका–६ मट्यारीकी ३६ वर्षीया मिना खड्काको शनिवार मृत्यु भएको हो। जिल्ला प्रहरी कार्यालय कैलालीका डीएसपी कबिन्द्र सिंह बोहराका अनुसार कीर्तिपुरको बर्न अस्पतालमा उपचारका क्रममा खड्काको मृत्यु भएको हो।

२ चैतमा सिलिन्डर पड्किँदा मिनासँगै घाइते भएका अन्य दुई जनाको काठमाडौंमै उपचार भइरहेको छ। उक्त घट्नामा मृतककी छोरी २० वर्षीय चन्द्रा खड्का र ग्यास बिक्रेता स्थानीय व्यापारी ४० वर्षीय गोविन्दराज जोशी पनि घाईते भएका थिए।

खड्काले जोशीको पसलबाट ग्यास सिलिन्डर खरिद गरेकी थिईन। जोशीलाई ग्याँस जोड्नका लागि बोलाएको थियो। सोही क्रममा सिलिन्डर पड्किएपछि उनीहरु तीनै जना घाइते भएका थिए।