विराटनगर– इलामको सूर्योदय नगरपालिका–६ कन्यामका राम राईले पालेको जिउँदै गोरुको फिलाको करिव ५ किलो मासु चोरी भएको छ। जिउँदै अवस्थामा फिलाको मासु काटेर लगेका कारण गोरुको मृत्यु भएको राइले वताए।

यो घटना पहिलोपटक भएको भने होइन। यसअघि गत १६ फागुनमा सोही गोरुको फिलाबाट मासु चोरी भएको थियो। औषधीमुलो गरेर उक्त घाउ निको हुनै लाग्दा शुक्रबार राति फेरी मासु काटेर लगेका कारण गोरु नै मरेको हो।

त्यसअघि सोही गोरुको हलको अर्को गोरुको पनि मासु चोरी भएको थियो। त्यस वेला पनि गोरु मरेको राई सुनाउँछन्। हलका दुवै गोरु मरेपछि गोठ रित्तो भएको भन्दै उनले दुःख व्यक्त गरे। घरदेखि केही टाढा गोठ रहेका कारण बिहानपख घाँस हाल्न थलामा जाँदा मात्रै मासु चोरी भएको आफुले थाहा पाएको उनले बताए।

कन्याममा बनिबुतो गरेर बस्ने गरेका राईले थलामा बाँधिएका चौपायालाई क्रुरतापूर्वक काटेर मासु झिक्नेको पहिचान गरी कारबाही गर्न माग गरेका छन्। मासु काटिएका कारण गोरु मरेको भीडीओ फेसबुकमा सार्वजनिक भएको छ।

गाउँमा यस्ता घटना बारम्बार भइरहेको स्थानीयहरु बताउँछन्। वडाध्यक्ष शिवकुमार बस्नेत घटनास्थल रहेको टोलमा अरु पनि धेरै नै विकृति बढेको बताउँछन्।