काठमाडौँ– शारीरिक सम्वन्ध राख्न नमान्दा ढुङ्गाले हानेर दुई किशोरीको हत्या गरेको आरोपमा पक्राउ परेका अछामको ढकारी गाउँपालिका–३, तालीका १७ र १५ वर्षका दुईजना किशोरलाई अदालतले बाल सुधार गृह पठाउने आदेश दिएको छ।

गत ११ माघमा अछामको ढकारी गाउँपालिका–८, पल्साताका १४ वर्षीया इशरा खड्का र १५ वर्षीया सरस्वती खड्काको हत्या अभियोग लागेका उनीहरुलाई अछाम जिल्ला अदालतले सुधार गृह पठाउन आदेश दिएको हो।

जिल्ला प्रहरी कार्यालय अछामका इन्स्पेक्टर टेकबहादुर देउवाका अनुसार हत्यामा संलग्न दुवै किशोर १८ वर्षमुनिका भएकाले उनीहरूलाई सुधार गृहमा राखिएको हो।

प्रहरी अनुसन्धान अनुसार १४ वर्षीया इशरा र १५ वर्षीया सरस्वती ती किशोरहरूसँग प्रेम सम्बन्धमा रहेको खुलेको छ। नातामा सरस्वती फुपू र इशरा भदैनी हुन। शारीरिक सम्बन्ध राख्न अस्वीकार गरेकै कारण उनीहरुको बीभत्स तरिकाले हत्या गरिएको निष्कर्ष प्रहरीको छ।

प्रहरीका अनुसार करिव इशरा र सरस्वती एक वर्षदेखि ती किशोरसँग निरन्तर फोन सम्पर्क र भेटघाटमा थिए। हत्या हुनु दुई दिनअघि छिन्ने जंगलमा भेट्ने योजना उनीहरुले बनाएका थिए। माघी मनाउन गाउँ आएका बेला ती किशोरहरू बाख्रा चराउन जंगल गएका प्रेमिकालाई भेट्न गएको पाईएको छ।

जंगलमा ती किशोरहरूले शारीरिक सम्बन्धको प्रस्ताव राखे। सरस्वतीले ‘बिहे गर्ने हो भने मात्र सम्भव छ’ भन्ने अडान लिएपछि किशोरले ५–६ वर्षपछि बिहे गर्ने सर्तमा शारीरिक सम्बन्ध राख्न खोजे। तर सरस्वतीले मानिनन्।

यौन सम्पर्कको प्रस्ताव अस्वीकार गरेर खोलातर्फ लाग्दै गर्दा आक्रोशित भएका एक युवकले ढुंगा उठाएर उनको टाउकोमा प्रहार गरे। उनको तत्कालै मृत्यु भयो। सरस्वतीको मृत्यु भएपछि इशरा विलौना गर्न थालिन भने घरमा भन्दिने अडान राखिन। उनलाई फकाउने प्रयास असफल भयो। त्यसपछि सरस्वतीकै प्रेमी भनिने युवकले उनलाई पनि निधारमा लाग्ने गरी ढुंगाले हाने। अनि उनकै प्रेमीले पनि अनुगहारमा ढुंगाले हाने।

त्यसपछि उनीहरुले हत्या ढाकछोप र घटनालाई प्राकृतिक मृत्युजस्तो देखाउन माथिबाट ढुंगा खसाएको प्रहरी अनुसन्धानबाट खुलेको छ। प्रहरीले घटनास्थलमा ठूल्ठूला ढुंगाहरू खसेकोसमेत फेला पारेको थियो। त्यसपछि उनीहरु त्यहाँबाट फरार भएका थिए। पछि प्रहरीले दुवै किशोरलाई पक्राउ गरेको थियो। घट्नाको अनुशन्धान गरी प्रहरीले तयार गरेको प्रतिवेदनका आधारमा अदालतमा मुद्दा दायर भएको थियो।